နေပြည်တော်၊ အောက်တိုဘာလ (၄) ရက်

ဟိုတယ်နှင့်ခရီးသွားလာရေးဝန်ကြီးဌာနသည် နိုင်ငံတကာမှ ခရီးသွားဧည့်သည်များ မြန်မာနိုင်ငံသို့ လုံခြုံစိတ်ချစွာဖြင့် အဆင်ပြေလွယ်ကူစွာ သွားရောက်လည်ပတ်နိုင်ရေးကို ဆောင်ရွက်ပေးလျက်ရှိရာ နိုင်ငံခြားသား ကမ္ဘာလှည့် ခရီးသွားဧည့်သည်များသည် မြန်မာနိုင်ငံ၏ ရေမြေတောတောင် သဘာဝအလှများ၊ ခရီးသွားဆွဲဆောင်သည့်နေရာများ၊ တိုင်းရင်းသားတို့၏ မတူကွဲပြားသည့် ရိုးရာယဉ် ကျေးမှု ဓလေ့စရိုက်များ၊ လူနေမှုဘ၀ပုံစံများကို ကြည့်ရှုလေ့လာ သိမြင်ခံစားနိုင်ရန်အတွက် အပြည် ပြည်ဆိုင်ရာဝင်ပေါက်များနှင့် နယ်စပ်ဝင်ပေါက်များမှတစ်ဆင့် မြန်မာနိုင်ငံအတွင်းသို့ အဆက်မပြတ် ၀င်ထွက်သွားလာ လည်ပတ်လျက် ရှိပါသည်။

ဟိုတယ်နှင့်ခရီးသွားလာရေးဝန်ကြီးဌာန၏ ကူညီဆောင်ရွက်ပေးမှုနှင့် Golden Express Tours Co., Ltd ၏ စီစဉ်ဆောင်ရွက်မှုတို့ဖြင့် ဂျာမနီနိုင်ငံမှခရီးသွား(၂) ဦးတို့သည် ကိုယ်ပိုင်မော်တော်ယာဉ်(၁) စီးတို့ဖြင့် ၂၀၁၈ ခုနှစ်၊ စက်တင်ဘာလ (၂၃) ရက်နေ့မှ စက်တင်ဘာလ (၂၉) ရက်နေ့အထိ တမူးနယ်စပ် ဂိတ်မှ ဝင်ရောက်လာပြီး တမူး – ကလေး – မန္တလေး – တောင်ကြီး – ကက္ကူ – ပဲခူး – ဘားအံ – မြဝတီမြို့များ သို့ သွားရောက်၍ အဆိုပါဒေသများရှိ ထင်ရှားသော နေရာများကိုလည်ပတ်ခဲ့ကြပြီး စက်တင်ဘာလ(၂၉) ရက်နေ့တွင် မြဝတီနယ်စပ်ဂိတ်မှတဆင့် ထိုင်းနိုင်ငံသို့ ပြန်လည်ထွက်ခွာသွားကြ ပါသည်။

ယခုအချိန်သည် ပွင့်လင်းရာသီသို့ ရောက်ရှိလာသည်နှင့်အမျှ နိုင်ငံခြားသားဧည့်သည်များ သည် မြန်မာနိုင်ငံသို့ လေကြောင်း၊ ရေကြောင်းများဖြင့်လည်းကောင်း၊ နယ်စပ်ဝင်/ ထွက်ပေါက်များမှ ကိုယ်ပိုင်မော်တော်ယာဉ်/ ဆိုင်ကယ်များဖြင့် လည်းကောင်း၊ ၎င်းတို့၏ အစီအစဉ်ဖြင့်လည်းကောင်း၊ ဝင်ရောက်လာပြီး မြန်မာနိုင်ငံ၏ထင်ရှားသောဒေသများသို့ သွားရောက်လည်ပတ်လျက်ရှိကြောင်း သတင်း ရရှိပါသည်။