နေပြည်တော်၊ မတ်လ ၆ ရက်

ပြည်တွင်းပြည်ပ မှ ခရီးသွားဧည့်သည်များသည် မြန်မာနိုင်ငံ၏ တောတောင်ရေမြေ သဘာဝ အလှအပများ၊ တိုင်းရင်းသား လူမျိုးများ၏ ရိုးရာယဉ်ကျေးမှု ဓလေ့စရိုက်များကို ကြည့်ရှုလေ့လာခံစား နိုင်ရန် လေကြောင်း၊ ရေကြောင်း များဖြင့် သာမက နယ်စပ်ဝင်/ထွက်ပေါက်များမှ ကိုယ်ပိုင်မော်တော်ယာဉ် များဖြင့်လည်းကောင်း၊ ပြည်တွင်းမြစ်ကြောင်းခရီးစဉ်များကိုလည်းကောင်း လာရောက်လည်ပတ်လျက် ရှိပါသည်။

          ဟိုတယ်နှင့်ခရီးသွားလာရေးဝန်ကြီးဌာန၏ ကြီးကြပ်မှု Myanmar Mystery Land Travels & Tour Co.,Ltd ၏ စီစဉ်ဆောင်ရွက်မှုတို့ဖြင့် ထိုင်းနိုင်ငံသား(၅)ဦးသည်  ၄င်းတို့၏ ကိုယ်ပိုင်မော်တော်ယာဉ် (၃)စီးဖြင့် ၂၀၁၉ ခုနှစ်၊ ဖေဖော်ဝါရီလ (၁၇) ရက်နေ့မှ  ဖေဖော်ဝါရီလ (၂၆) ရက်နေ့အထိ ထီးခီး- ထားဝယ်- မော်လမြိုင်- ရန်ကုန်- နေပြည်တော်- ပုဂံ- မန္တလေး- အင်းလေး- နမ့်စန်- ကျိုင်းတုံ- တာချီလိတ် ခရီးစဉ်အတိုင်း သွားရောက်လည်ပတ်၍ တာချီလိတ်နယ်စပ်ဂိတ်မှ ထိုင်းနိုင်ငံသို့ပြန်လည် ထွက်ခွာ သွားကြပြီး အဆိုပါခရီးစဉ်တွင် ရန်ကုန်မြို့သို့ရောက်ရှိစဉ် ထိုင်းနိုင်ငံသူ(၁)ဦးနှင့် တောင်အာဖရီက နိုင်ငံသား(၁)ဦးတို့သည် ဖော်ပြပါဧည့်သည်(၅)ဦးနှင့် ပေါင်းကာ နေပြည်တော်- ပုဂံ- မန္တလေးမြို့များသို့ လိုက်ပါလည်ပတ်ကာ ၂၃-၂-၂၀၁၉ ရက်နေ့တွင် ရန်ကုန်မြို့မှတဆင့် ထိုင်းနိုင်ငံ၊ ဘန်ကောက်မြို့သို့ ထွက်ခွာသွားကြပါသည်။

          နိုင်ငံခြားသားခရီးသွားဧည့်သည်များ မြန်မာနိုင်ငံသို့ ပိုမိုတိုးမြှင့်ဝင်ရောက်နိုင်ရေးအတွက် ခရီးစဉ် ဒေသအသစ်များ ဖော်ထုတ်ခြင်းနှင့်ဘက်ပေါင်းစုံမှ ဖြေလျှော့ဆောင်ရွက်မှုများကြောင့် မြန်မာနိုင်ငံ၏ ထင်ရှားသောဒေသများသို့ စဉ်ဆက်မပြတ်လာရောက်လည်ပတ် လျက်ရှိကြောင်း သတင်းရရှိပါသည်။