နေပြည်တော်၊ နိုဝင်ဘာလ (၃၀) ရက်

ဟိုတယ်နှင့်ခရီးသွားလာရေးဝန်ကြီးဌာနနှင့် အာဆီယံ-ဂျပန်ဗဟိုဌာန (ASEAN- Japan Centre) တို့ပူးပေါင်း၍ ခရီးသွားလုပ်ငန်းဈေးကွက်မြှင့်တင်မှုဆွေးနွေးပွဲ(Tourism Marketing Seminar) ကို မန္တလေးမြို့ရှိ Mercure Mandalay Hill Resort Hotel ၌ (၃၀-၁၁-၂၀၁၈) ရက်နေ့တွင် ကျင်းပပြုလုပ်ခဲ့ပါသည်။

အဆိုပါဆွေးနွေးပွဲကို မြန်မာနိုင်ငံခရီးသွားလုပ်ငန်းဖွံ့ဖြိုးမှုကို တွန်းအားပေးဆောင်ရွက်ရန်၊ ဟိုတယ်နှင့် ခရီးသွားလာရေးဝန်ကြီးဌာန၏ ခရီးသွားလုပ်ငန်းမြှင့်တင်မှုမူဝါဒများကို အထောက်အကူပြုရန်၊ အထူးသဖြင့်မြန်မာနိုင်ငံသို့ ဂျပန်နိုင်ငံသားခရီးသွားဧည့်သည်များ ပိုမိုလာရောက်လည်ပတ်နိုင်ရေးအတွက် ဂျပန်လူမျိုးခရီးသွားများ၏ ခရီးသွားအလေ့အထ၊  ကြိုက်နှစ်သက်မှုနှင့် ဦးစားပေးမှုများကို သိရှိနားလည်ပြီး ပိုမိုကောင်းမွန်သော ဝန်ဆောင်မှုများကို ပေးနိုင်ရန်နှင့် အာဆီယံတွင် အကောင်အထည်ဖော်ဆောင် နေသည့် အာဆီယံခရီး သွားလုပ်ငန်း ကျွမ်းကျင်ပညာရှင်များ အပြန်အလှန်အသိအမှတ်ပြုရေး အစီအစဉ် (MRA-TP) ကို အထောက်အပံ့ပြုရန် ရည်ရွယ်ကျင်းပခဲ့ခြင်း ဖြစ်ပါသည်။

ရှေးဦးစွာ ဟိုတယ်နှင့်ခရီးသွားလာရေးဝန်ကြီးဌာန၊ ဟိုတယ်နှင့်ခရီးသွားညွှန်ကြားမှုဦးစီးဌာနမှ ညွှန်ကြားရေးမှူး ဦးလှမြင့်နှင့် အာဆီယံ-ဂျပန်ဗဟိုဌာနမှ ညွှန်ကြားရေးမှူး Mr.Vathouniyom Douangmala တို့က အဖွင့်အမှာစကားများ အသီးသီး ပြောကြားကြပါသည်။

ဆက်လက်၍ ဆွေးနွေးပွဲကို ကဏ္ဍအလိုက်ဆွေးနွေးခဲ့ကြရာ မြန်မာနိုင်ငံခရီးသွားလုပ်ငန်းအဖွဲ့ချုပ် မှ တွဲဖက်အထွေထွေအတွင်းရေးမှူး ဦးကျော်မင်းထင်က “မြန်မာနိုင်ငံအားဂျပန် ခရီးသွားများအတွက် ထပ်တိုးလည်ပတ်သင့်သည့် ခရီးစဉ်ဒေသအဖြစ်မြှင့်တင်ခြင်း” ခေါင်းစဉ်ဖြင့်လည်းကောင်း၊ Tourism Shizuoka Japan ၏ ညွှန်ကြားရေးမှူးဖြစ်သူ Mr. Naohiro Fukawa က “ဂျပန်ခရီးသွားဧည့်သည်များ၏ အလေ့အထနှင့် ၎င်းတို့အား ဦးတည်သော ဈေးကွက်နှင့်ခရီးသွားထုတ်ကုန်များဖွံ့ဖြိုးမှု” ခေါင်းစဉ်ဖြင့် လည်းကောင်း၊ UNWTO Regional Support Officer for Asia and the Pacific ၏ Deputy Manager ဖြစ်သူ Ms. Ariana Luquin Sanchez က“ကမ္ဘာ့ခရီးသွားလုပ်ငန်းအဖွဲ့ချုပ်၏လုပ်ငန်းဆောင် ရွက်ချက် များနှင့် မြန်မာနိုင်ငံတွင် ဆောင်ရွက်နေသည့်လုပ်ငန်းစဉ်များ” ခေါင်းစဉ်ဖြင့်လည်းကောင်း၊ ဟိုတယ်နှင့် ခရီးသွားလာရေးဝန်ကြီးဌာန၊ ဟိုတယ်နှင့်ခရီးသွားညွှန်ကြားမှုဦးစီးဌာနမှ ညွှန်ကြားရေးမှူး (တာဝန်ခံ) ဦးအောင်သူက “ခရီးသွားလုပ်ငန်းနှင့်ဧည့်ဝန်ဆောင်မှု ကဏ္ဍတွင် အာဆီယံခရီးသွားလုပ်ငန်း ကျွမ်းကျင် ပညာရှင်များ အပြန်အလှန်အသိအမှတ်ပြုရေးအစီအစဉ် (MRA-TP) ကို အသုံးချခြင်း” ခေါင်းစဉ်ဖြင့် လည်းကောင်း အသီးသီးဆွေးနွေးခဲ့ကြပြီး စုပေါင်းဆွေးနွေးခြင်းနှင့် အမေးအဖြေကဏ္ဍကို ဆက်လက် ကျင်းပ၍ အလုပ်ရုံ ဆွေးနွေးပွဲကို ညနေ(၀၄:၀၀) နာရီတွင် ရုပ်သိမ်းခဲ့ပါသည်။

အဆိုပါ ဆွေးနွေးပွဲသို့ အစိုးရနှင့် ပုဂ္ဂလိကခရီးသွားလုပ်ငန်းနယ်ပယ်မှ ခရီးသွားလုပ်ငန်း လုပ်ကိုင် ဆောင်ရွက်နေသူများ၊ ဧည့်လမ်းညွှန်များ၊ ဟိုတယ်လုပ်ငန်းရှင်များ၊ ခရီးသွားလုပ် ငန်းအေဂျင်စီများ၊ ခရီးသွားလုပ်ငန်းအဖွဲ့အစည်းမှ တာဝန်ရှိသူများ စုစုပေါင်း(၁၀၀) ဦးခန့် ပါဝင်တက်ရောက်ခဲ့ကြောင်း သတင်းရရှိပါသည်။