မြင့်ထွေး (ဟိုတယ်/ခရီး)

မောင်းနေသော မတ်တူးကားမှာ လေအေးစက်ဖွင့်ထားသော်လည်း အသက်ရှုမ၀ဖြစ်လာခြင်း၊ လမ်းအကွေ့အကောက်များ ဖြတ်သန်းမောင်းနှင်နေခြင်းကြောင့် မူးလာသဖြင့် ရှေ့တွင်ထိုင်နေသော ဒုညွှန်မှူးကို တံခါးလေးဖွင့်ပေးရန် မေတ္တာရပ်ခံမိသည်။တစ်ဆက်တည်း မိမိဘေးရှိ တံခါးကိုလည်းဖွင့်ကာ အပြင်လေကို တစ်ဝကြီးရှုလိုက်မှ အနည်းငယ်သက်သာသွားသော်လည်း အမူးကမပျောက်။ ခရီးသွားနေစဉ် ဖုန်းဖြင့်ဆောင်ရွက်ရမည့် အရေးကြီးလုပ်ငန်းတစ်ခုပေါ်လာ၍ ဖုန်းနံပါတ်ရှာခြင်း၊ ဖုန်းဆက်ခြင်း၊ Message ပေးပို့ခြင်းများကို ဆက်တိုက်ပြုလုပ်နေမှုကြောင့် မူးလာခြင်းလည်း ဖြစ်နိုင်သည်။

ကားမောင်းနေသော မိတ်ဆွေမှ၊ မျက်လုံးမှိတ်ပြီး မှိန်းလိုက်လေဟုပြောသော်လည်း၊ သူပြောသည့် အတိုင်းမလုပ်ဖြစ်။ မူးချင်မူးပါစေ၊ မျက်လုံး မှိတ်ပြီးတော့ မလိုက်ချင်။ မရောက်ဖူးသော၊ မမြင်တွေ့ဘူးသော၊ ဒေသစိမ်းနှင့် ရှုခင်းသစ်များကို လက်လွှတ်မခံချင်၍ ကားမူးနေလျက်နှင့် မျက်လုံးမှိတ်၊ မှိန်းမနေနိုင်ဘဲ ရှုခင်းများကို ကြည့်ရှုရင်း လိုက်ပါခဲ့သည်။

တစ်နာရီကီလို (၈၀) ခန့် မောင်းနှင်းနေသောကားအား မှန်တံခါးချ၍ လိုက်ပါခြင်းကြောင့် ပြင်းထန်သော လေရိုက်ခတ်မှုက မျက်နှာသို့ တိုက်ရိုက် ကျရောက်နေသဖြင့် မျက်လုံးမှမျက်ရည်များပင် ထွက်ကုန်သည်။ ဖြစ်ချင်တော့ မိုးတွင်းခရီးသွားခြင်းဖြစ်၍ နေကာမျက်မှန် မယူလာခဲ့မိ။ မျက်ရည်များကို သုတ်ရင်း၊ ဒုညွှန်မှူးမှ ပေးသော အမူးပြေဆေးကို သောက်လိုက်သည်။သူက ကျွန်တော်လည်း ချွေးစီးတွေကျပြီး မူးနေတာဟုဆိုသည်။ ကားမူးတတ်သူဖြစ်၍ ဆေးအသင့်ယူဆောင်လာမှုကြောင့် ကျွန်တော့အတွက် အဆင်ပြေသွားသည်။

ကားမောင်းသူ ကျွန်တော့မိတ်ဆွေမှာ ကျွန်တော်နှင့် သက်ရွယ်တူဖြစ်သော်လည်း၊ နားကပ်၊ လက်ကောက်၊ လည်ဆွဲများဖြင့် ခေတ်ဆန်စွာဝတ်စား ထား၍ ကျွန်တော့ထက် ပိုနုပျိုနေတယ်ဟု သူ့ကိုကျီစယ်ကာ၊ သူနှင့်အတူ ဆောင်ရွက်ခဲ့သော ခရီးသွားလုပ်ငန်းမြှင့်တင်ရေးကိစ္စများကို ပြန်ပြောင်းပြောကြ ရင်းတောင်တက်၊ တောင်ဆင်း၊ အကွေ့အကောက်များအားဖြတ်ကျော်ကာတဖြည်းဖြည်းနှင့် ပဲခူးရိုးမတောထဲသို့ ၀င်ရောက်လာသည်။

ရန်ကုန်၊ မန္တလေးအမြန်လမ်းမကြီးနှင့် ရန်ကုန်၊ ပြည်၊ ရေနံချောင်းလမ်းတစ်လျောက် နှစ်ဖက်လမ်းမကြီးကြားအတွင်းရှိ၊ ပဲခူးရိုးမတောကြီးတွင် ရိုးမဖြတ် လမ်း (၇) ခုရှိပါသည်။အဆိုပါ ရိုးမဖြတ်လမ်း(၇) ခုသည် တောင်၊ မြောက်အပြိုင်တန်းနေသော အမြန်လမ်းမကြီးနှင့်၊ ပြည်လမ်းမကြီးတို့အား အရှေ့၊နောက်အပြိုင် ချိတ်ဆက်ထားသော ဖြတ်လမ်းများ ဖြစ်ပါသည်။ ပထမရိုးမဖြတ်လမ်းမှာ ပျော်ဘွယ်၊ နတ်မောက်လမ်းဖြစ်ပြီး (၉၁) မိုင်၊ ၄ ဖာလုံ ရှည်လျားပါသည်။ ဒုတိယဖြတ်လမ်းမှာ ပျဉ်းမနား၊ ပန်းတင်မြို့သစ်လမ်းဖြစ်ပြီး(၇၉)မိုင်၊ (၄)ဖာလုံ ရှည်လျားပါသည်။ တတိယရိုးမဖြတ်လမ်းမှာ ပျဉ်းမနား၊ ချောင်းနက်လမ်းဖြစ်ကာ (၆၆)မိုင်၊ (၂) ဖာလုံရှိပါသည်။ သာဂရ၊ ကိုးပင်ရိုးမဖြတ်လမ်းကတော့ (၉၂)မိုင်၊ (၄) ဖာလုံ ရှည်လျားကာ စတုတ္ထဖြတ်လမ်း ဖြစ်ပါသည်။

အုတ်တွင်း၊ ပေါက်ခေါင်းလမ်းမှာ (၁၂၅)မိုင်၊ (၁) ဖာလုံ ရှည်လျားသော ပဉ္စမမြောက်ရိုးမဖြတ်လမ်းဖြစ်ပါသည်။ ဆဌမရိုးမဖြတ်လမ်းကတော့ မြို့ချောင်း၊ စိန်ကန့်လန့်လမ်းဖြစ်ကာ (၈၄)မိုင်၊ (၇)ဖာလုံ ရှည်လျားပါသည်။ သတ္တမမြောက်လမ်းကတော့ လူသိများသော ပဲခူး- တိုက်ကြီးလမ်းဖြစ်ပြီး (၃၈) မိုင်၊ (၄) ဖာလုံ ရှည်လျားပါသည်။

ကျွန်တော်တို့ကားမှာ ပဲခူးရိုးမတောကြီးအား ဖြတ်သန်းဖောက်လုပ်ထားသည့် အုတ်တွင်း၊ ပေါက်ခေါင်း ရိုးမဖြတ်လမ်းပေါ်တွင် မောင်းနှင်နေခြင်းဖြစ်ပါ သည်။သဘာဝအတိုင်း ကျန်ရှိနေသောပဲခူးရိုးမသစ်တောကြီးများအတွင်း သဘာဝအခြေခံခရီးသွားလုပ်ငန်း (Eco Tourism) အား မြှင့်တင်ရင်း၊ လာရောက်မည့် ပြည်တွင်း/ပြည်ပဧည့်သည်များအတွက်တည်းခိုနေထိုင်ရန် ပြင်ဆင်ဆောင်ရွက်ထားမှုများကို လည်းကောင်း၊ရိုးမအတွင်း နေထိုင်သောတိုင်းရင်းသားများ၏ လူနေမှုဘ၀များ ဓလေ့ထုံးတမ်းစဉ်လာများကိုလည်းကောင်း၊ဆက်စပ်နေသော ခရီးစဉ်အတွင်း ကမ္ဘာလှည့်ခရီးသည်များအား ပြသနိုင်မည့်ဆင်စခန်းများ၊ နှစ်သက်တမ်းရှည် ကျွန်းပင်ကြီးများ၊ ယဉ်ကျေးမှုအမွေအနှစ်များ စသည်တို့အား ပြည်သူလူထု သိရှိစေရန်နှင့် ပြည်ပခရီးသွားဧည့်သည်များသို့ ဈေးကွက် တင်ရောင်းချနိုင်ရေးအတွက်လည်းကောင်း၊ သည်လမ်းခရီးအား သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာနနှင့် ဟိုတယ်နှင့်ခရီးသွားလာရေး ၀န်ကြီးဌာန (၂) ခု ပူးပေါင်းညှိနှိုင်း၍ လာရောက်ခဲ့ခြင်းဖြစ်ပါသည်။

သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာနသည် ရေခဲဖုံးလွှမ်းနေသည့် တောင်တန်းများ၊ ရေ၀ပ်ဒေသများ၊ ထူးခြားသည့် သစ်တောများ၊ ပင်လယ်ရေပြင်၊ သန္တာကျောက်တန်းများနှင့် မှီတင်းနေထိုင်ကြသည့် ဇီဝမျိုးစုံ၊ မျိုးကွဲများပါဝင်သည့် သဘာဝလက်ဆောင်များအား ထိန်းသိမ်း ရန်အတွက် သဘာဝနယ်မြေ (၁၅) ခုကို ၂၀၀၅ ခုနှစ်မှစတင်၍ ဖွဲ့စည်းတည်ထောင်ခဲ့ပြီး။ (၂၀၁၁) ခုနှစ်တွင် (၂၁) ခုအထိ တိုးချဲ့ဖွဲ့စည်းသတ်မှတ်ခဲ့ပါသည်။

သဘာဝအခြေခံခရီးစဉ်ဒေသများအဖြစ် စစ်ကိုင်းတိုင်းဒေသကြီး၌ (၂) ခုရှိရာ ယင်းမာပင်မြို့နယ်တွင် အလောင်းတော်ကဿပနှင့် ကန့်ဘလူမြို့နယ် တွင် ချပ်သင်းဘေးမဲ့တောဖြစ်ပါသည်။ ကချင်ပြည်နယ်၌ (၄) ခုရှိရာ နောင် မွန်မြို့နယ်တွင် ခါကာဘိုရာဇီ အမျိုးသားဥယျာဉ်၊ ဖုန်ကန်ရာဇီဘေးမဲ့တော၊ တနိုင်းမြို့နယ်တွင် ဟူးကောင်ချိုင့်ဝှမ်းဘေးမဲ့တောနှင့် မိုးညှင်းမြို့နယ်တွင် အင်းတော်ကြီး ဘေးမဲ့တောတို့ဖြစ်ပါသည်။

ရန်ကုန်တိုင်းဒေသကြီး၌ (၂) ခုရှိရာ၊ မင်္ဂလာဒုံမြို့နယ်တွင် လှော်ကားဥယျာဉ်နှင့် တိုက်ကြီးမြို့နယ်တွင် မြိုင်ဟေ၀န် ဆင်စခန်းဖြစ်ပါသည်။ ရှမ်းပြည်နယ်၌ (၂) ခုရှိရာ၊ ညောင်ရွှေ၊ ဖယ်ခုံမြို့နယ်တွင် အင်းလေးကန်ဘေး မဲ့တောနှင့် ပင်းတယမြို့တွင် ပင်လောင် ပြဒါးလင်းဂူဘေးမဲ့တော တို့ဖြစ်ပါသည်။

မွန်ပြည်နယ်၌ ကျိုက်ထိုမြို့တွင် ကျိုက်ထီးရိုးဘေးမဲ့တော၊ တနင်္သာရီတိုင်းဒေသကြီး၌ မြိတ်ခရိုင်တွင် လန်ပိအမျိုးသားဥယျာဉ်နှင့် မန္တလေးတိုင်းဒေ သကြီး၌ ညောင်ဦးမြို့တွင် လောကနန္ဒာဘေးမဲ့တောနှင့် ကျောက်ပန်းတောင်းမြို့တွင် ပုပ္ပါးတောင်ဥယျာဉ် တို့ဖြစ်ပါသည်။

ပဲခူးတိုင်းဒေသကြီး၌ ပဲခူးမြို့တွင် မိုးယွန်းကြီးဘေးမဲ့တော၊ ရေတာရှည်မြို့နယ်တွင် ဖိုးကျားဆင်စခန်းတို့ဖြစ်ပြီး၊ ချင်းပြည်နယ်၌ ကန်ပက်လက်မြို့ နယ်တွင် ခေါ်နူးစုန်အမျိုးသားဥယျာဉ် တို့ဖြစ်ပါသည်။

မကွေးတိုင်းဒေသကြီး၌ စကုမြို့တွင် ရွှေစက်တော်ဘေးမဲ့တောနှင့် စလင်းမြို့တွင် ၀က်ထီးကန်ငှက် လေ့လာရေးဥယျာဉ်တို့ဖြစ်ကာ ဧရာဝတီတိုင်းဒေသ ကြီး၌ ဘိုကလေးမြို့နယ်တွင် သမီးလှကျွန်းဘေးမဲ့တော ဥယျာဉ်တို့ဖြစ်ပါသည်။

သဘာဝနယ်မြေများနှင့် ဆက်စပ်၍ တိုင်းရင်းသားလူမျိုးများ၏ နေထိုင်မှုဘ၀များနှင့် ယဉ်ကျေးမှုများအားလေ့လာနိုင်သည့် သဘာဝအခြေခံခရီးသွား လုပ်ငန်းကို ဖော်ဆောင်ရန်အတွက် သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာနနှင့် ဟိုတယ်နှင့်ခရီးသွားလာရေးဝန်ကြီးဌာနတို့ပူးပေါင်းကာ မြန်မာနိုင်ငံ သဘာဝအခြေခံခရီးသွားလုပ်ငန်းမူဝါဒနှင့် စီမံခန့်ခွဲမှုမဟာဗျူဟာ (၂၀၁၅-၂၀၂၅) (Myanmar Eco-Tourism Policy and Management Strategy (2015-2025))ကို အပြည်ပြည်ဆိုင်ရာတောင်တန်းဒေသ ဘက်စုံဖွံ့ဖြိုးရေးဗဟိုဌာန (International Centre for Integrated Mountain Development) (ICIMOD) ၏ နည်းပညာ အထောက်အပံ့၊ ဥရောပသမဂ္ဂ၏ ငွေကြေးထောက်ပံ့မှုဖြင့် ရေးဆွဲခဲ့ခြင်းဖြစ်ပါသည်။

အဆိုပါ မဟာဗျူဟာတွင် အစီအစဉ်(၆) ခုပါဝင်ပြီး၊ အစီအစဉ် (၁) မှာ အဖွဲ့အစည်းဆိုင်ရာ အစီအစဉ်များကို ပိုမိုခိုင်မာလာစေခြင်း၊ အစီအစဉ်(၂)မှာ သဘာဝနယ်မြေများအတွင်းနှင့် အပြင်တွင် သဘာဝအခြေခံခရီးသွားလုပ်ငန်း စီမံချက် ရေးဆွဲခြင်းအား တိုးမြှင့်သွားရန်၊ အစီအစဉ် (၃) မှာ ဒေသခံပြည်သူများ ပူးပေါင်းပါဝင်လာစေခြင်း၊ အစီအစဉ် (၄) မှာ အခြေခံအဆောက်အဦးများနှင့် တာဝန်ယူနိုင်စွမ်းရှိသည့် စီးပွားရေးလုပ်ငန်း နမူနာပုံစံများတွင် ရင်းနှီးမြှုပ်နှံခြင်း၊ အစီအစဉ် (၅) မှာ သုတေသနပြုလုပ်ခြင်းနှင့် စောင့်ကြည့်လေ့လာခြင်းဆိုင်ရာ မူဘောင်များကို ပိုမိုခိုင်မာလာစေခြင်းနှင့် အစီအစဉ် (၆) မှာ ဈေးကွက်ရှာဖွေ မှုနှင့် ရှင်းလင်းတင်ပြမှုများ ပိုမိုခိုင်မာစေခြင်းတို့ဖြစ်ပါသည်။

သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနနှင့် ဟိုတယ်နှင့်ခရီးသွားလာရေးဝန်ကြီးဌာနတို့သည်အဆိုပါမဟာဗျူဟာ(၆)ခုအား သတ်မှတ်အချိန်ကာလများအတိုင်း အကောင်အထည်ဖော်ဆောင်ရွက်လျက်ရှိပါသည်။ သဘာဝအခြေခံခရီးသွားဒေသအဖြစ် သတ်မှတ်ထားသောဒေသ များတွင် ခရီးသွားလည်ပတ်ရန် ခက်ခဲသောနေရာများ၊ ခရီးသွားလည်ပတ်ရန် အနည်းငယ်ခက်ခဲသောနေရာများနှင့် ခရီးသွားလည်ပတ်ရန် လွယ်ကူသောနေရာ များအဖြစ် ခရီးစဉ်၏ အခြေအနေများအပေါ်လိုက်၍ လိုအပ်ချက်များ ရှိနေတတ်ပါသည်။

ခါကာဘိုရာဇီ၊ ဖုန်ကန်ရာဇီ၊ ဟူးကောင်ချိုင့်ဝှမ်း၊ အင်းတော်ကြီး၊ လန်ပိ၊ သမီးလှကျွန်းတို့သည် ကမ္ဘာလှည့်ခရီးသည်များ အလွန်သွားရောက်လေ့ လာလည်ပတ်လိုသော သဘာဝခရီးစဉ်များဖြစ်သော်လည်း၊ လမ်းပန်းဆက်သွယ်ရေးခက်ခဲမှုကြောင့် သွားရောက်မှုနည်းလှသည်ကိုတွေ့ရသည်။ အလောင်းတော်ကဿပ၊ ချပ်သင်း၊ ခေါ်နူးစုန်၊ မိန်းမလှကျွန်း၊ ပန်းလောင်နှင့် ပြဒါးလင်းဂူတို့မှာ သွားလာရန် အနည်းငယ်ခက်ခဲသော သဘာဝအခြေခံခရီး စဉ်များ ဖြစ်ပါသည်။

သွားလာရန်လွယ်ကူသော လှော်ကား၊ အင်းလေး၊ ကျိုက်ထီးရိုး၊ လောကနန္ဒာ၊ မိုးယွန်းကြီး၊ ဖိုးကျားနှင့် မြိုင်ဟေ၀န်၊ ရွှေစက်တော်နှင့် ပုပ္ပါးတောင်၊ ၀က်သည်းကန်တို့အား သွားရောက်လေ့လာလည်ပတ်သော ခရီးသည်များမှာ တစ်နှစ်ထက်တစ်နှစ် တိုးတက်များပြားလာသည်ကို တွေ့ရသည်။

သဘာဝအခြေခံခရီးသွားဒေသအဖြစ် သတ်မှတ်ထားသော ခရီးစဉ်များသို့ လာရောက်သော ဧည့်သည်များအပေါ်မူတည်၍ လည်းကောင်း၊ လမ်းပန်း ဆက်သွယ်ရေး အခြေအနေများအပေါ်မူတည်၍ လည်းကောင်း၊ လာရောက်သော ပြည်တွင်း၊ ပြည်ပဧည့်သည်များ တည်းခိုနေထိုင်ရန်အတွက် ဟိုတယ်/ တည်းခိုခန်း eco-lodges များ တည်ဆောက်ဖွင့်လှစ်ကြပါသည်။ သို့အတွက် အချို့သော သဘာဝအခြေခံခရီးသွားဒေသများတွင် တည်းခိုရန် အဆင်ပြေနိုင် သည်များရှိသကဲ့သို့ အချို့နေရာများတွင် တည်းခိုရန် အခက်အခဲများ ကြုံတွေ့ရသည်များ ရှိပါသည်။

သဘာဝအခြေခံခရီးသွားလုပ်ငန်း ပြည့်စုံအောင်မြင်စေရန် လမ်းပန်းဆက်သွယ်မှုလွယ်ကူ ချောမွေ့စေရေး၊ ခရီးစဉ်တွင် တည်းခိုနေထိုင်စားသောက် မှုများ အဆင်ပြေစေရေး၊ လှည့်လည်ပြသနိုင်မည့် အစီအစဉ်များ ထည့်သွင်းထားရှိရေး၊ နိုင်ငံတကာမှသိရှိနိုင်ရန် ခရီးစဉ်မြှင့်တင်ရေး၊ ခရီးသွားကုမ္ပဏီများမှ ခရီးစဉ်များရေးဆွဲကာ ရောင်းချပို့ဆောင်ရေး စသည့်ကဏ္ဍမျိုးစုံအား သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ ဟိုတယ်နှင့်ခရီးသွား လာရေးဝန်ကြီးဌာနနှင့် ဆက်စပ်ဝန်ကြီးဌာနများမှ ပူးပေါင်းပံ့ပိုးကူညီဖြည့်ဆည်း ဆောင်ရွက်ပေးလျက်ရှိပါသည်။

သဘာဝအခြေခံခရီးစဉ် ဒေသများတွင် ပြည်တွင်း/ ပြည်ပခရီးသည်များအနေဖြင့် ဘုရားဖူးခရီးစဉ်  ယဉ်ကျေးမှုအမွေအနှစ်ကို လေ့လာနိုင်သည့် ခရီးစဉ်နှင့် ဓလေ့ထုံးတမ်းစဉ်လာများကို လေ့လာနိုင်သော ခရီးစဉ်များဖြင့် ခွဲခြားလေ့လာလည်ပတ်နိုင်ပါသည်။ အလောင်းတော်ကဿပ၊ ပုပ္ပါးတောင်၊ အင်းတော်ကြီး၊ ရွှေစက်တော်၊ အင်းလေး၊ ၀က်သည်းကန်၊ ကျိုက်ထီးရိုး ခရီးစဉ်များသည် ဘုရားဖူးလာရောက် လည်ပတ်လေ့လာနိုင်သော ခရီးစဉ်များဖြစ် ပြီး၊ခါကာဘိုရာဇီ၊ ဖုန်ကန်ရာဇီ၊ ဟူးကောင်ချိုင့်ဝှမ်း၊ အင်းလေးခရီးစဉ်များသည် ယဉ်ကျေးမှုဆိုင်ရာ ထူးခြားသောအခြေအနေများဖြင့် လည်ပတ်နိုင်သောခရီးစဉ် များဖြစ်ကာ လန်ပိ၊ ခေါ်နူးစုန်ခရီးစဉ်များသည်  တိုင်းရင်းသားများ၏ ထူးခြားသည့် အလေ့အထများကို လေ့လာနိုင်သည့် ခရီးစဉ်များ ဖြစ်ပါသည်။

သို့အတွက် ပြည်တွင်း/ ပြည်ပခရီးသည်များ၏ ၀ါသနာပါရာ နှစ်သက်မှုအစီအစဉ်အတိုင်း သဘာဝအခြေခံခရီးစဉ်များကို လည်ပတ်လေ့လာနိုင်သော အခွင့်အလမ်းများရှိနေပါသည်။သဘာဝတရားများ ပြည့်လွှမ်းနေသော တောတောင်၊လျှိုမြောင်၊ စိမ့်စမ်းများဖြင့် ကမ္ဘာလှည့်ခရီးသွားများကို ဆွဲဆောင်ကာ ဒေသအတွင်းရှိ တိုင်းရင်းသားတို့၏ လူနေမှုဘ၀ကို အကျိုးရှိစေသည့် ခရီးသွားလုပ်ငန်းကို မြှင့်တင်ဖော်ဆောင်ရန် အခွင့်အလမ်းများစွာရှိနေသော ပဲခူးရိုး မတောကြီးအတွင်း၌ဤသဘာဝအခြေခံခရီးသွားလုပ်ငန်းကိုထဲထဲဝင်ဝင်လေ့လာမြှင့်တင်ဆောင်ရွက်နိုင်ရန် ကျွန်တော်တို့အဖွဲ့ရိုးမ ထဲသို့ဝင်ရောက် လာခြင်းဖြစ်ပါသည်။

ကျွန်တော်တို့အဖွဲ့တွင် ဟိုတယ်လုပ်ငန်းရှင်များ၊ ခရီးသွားလုပ်ငန်းရှင်များပါဝင်သလို၊သစ်တောဦးစီးဌာနမှ ဒုတိယညွှန်ကြားရေးမှူးချုပ် ဦးကျော်ကျော်လွင် တို့အဖွဲ့မှာလည်း အင်အားတောင့်တောင့်တင်းတင်းဖြင့် လိုအပ်သည်များ ကြိုတင်ပြင်ဆင်ဆောင်ရွက်ထားသည်ကို တွေ့ရပါသည်။

အထူးသဖြင့် သစ်ထုတ်လုပ်မှုကြောင့် သစ်တောပြုန်းတီးခြင်းတို့ အကြောင်းပြု၍ ပြောဆိုဝေဖန်မှုများအပေါ် ပဲခူးရိုးမတောကြီးမည်မျှအထိ စိမ်းစိုသာယာ လှပနေသည်ကို လက်တွေ့ပြသနိုင်မည့် အခွင့်အရေးတစ်ရပ်ရရှိတော့မည်ဖြစ်ခြင်းကြောင့် စိတ်အားထက်သန်မှုများပြည့်နေသည့် သစ်တောဦးစီးဌာနမှ အရာရှိကြီးများ၏ ယုံကြည်မှုမျက်ဝန်းများကို တွေ့ရသည်။

ပဲခူးရိုးမတောကြီးအတွင်း သစ်တောများထိန်းသိမ်းမှု၊ သစ်ထုတ်လုပ်မှု၊ ကျွန်းစိုက်ပျိုးမှု၊ သစ်ထုတ်လုပ်ရေးဆင်များ၏ အလေ့အထများ၊ တောဆင်ရိုင်း များ၏ အလေ့အထများ၊ သဘာဝအခြေခံခရီးသွားလုပ်ငန်းဆောင်ရွက်မှု အခြေအနေများကို လုပ်သက်အတွ့အကြုံများ ပေါင်းစပ်ကာ ရှင်းလင်းပြောကြားရန် စနစ်တကျ ကြိုတင်ပြင်ဆင်ထားမှုများကို တွေ့ရသည်။

ရန်ကုန်မှလာရောက်သည့် ခရီးသွားကုမ္ပဏီများ၏ယာဉ်မှာ စတင်ထွက်ခွာချိန်နောက်ကျခဲ့မှုကြောင့် ကျွန်တော်တို့ ရည်မှန်းသည့် အချိန်အတွင်းသို့ ရောက်ရှိမလာနိုင်၍လမ်းခရီးတစ်လျှောက်ရှိ ဆင်စခန်းများ၊ ကရင်တိုင်းရင်းသားကျေးရွာများဖြစ်သော ရွှေတောင်ရွာ၊ ငွေတောင်ရွာများသို့ လေ့လာရန်အ ခွင့်အလမ်းများကို စိတ်မကောင်းစွာ လက်လွှတ်ဆုံးရှုံးခဲ့ရသည်။ သို့ရာတွင် သစ်တောဦးစီးဌာန၏ ရှင်းလင်းဆောင်တွင်တော့ ပါဝါပွိုင့်၊ ပရိုဂျက်တာများဖြင့် ရှင်းလင်းပြသမှုအား သိရှိလေ့လာခွင့် ရခဲ့ပါသည်။

(၁၂၅) မိုင်ရှည်လျားသော ပေါက်ခေါင်း၊ အုတ်တွင်း ရိုးမဖြတ်လမ်းခရီး၏အလယ်ခန့်၊(၅၈) မိုင်၊ (၃) ဖာလုံရှိ ပင်လယ်ရေမျက်နှာပြင်အထက် အမြင့်ပေ (၁၅၃၀) တွင် သဘာဝသစ်တောရှုရပ်ကို ပြင်ဆင်ထားရှိပါသည်။ အဆိုပါသစ်တောရှုရပ်တွင် မျက်စိတစ်ဆုံးမြင်နေရသော သဘာဝသစ်တောများကို သစ်တော ဦးစီးဌာန၊ ဒုတိယညွှန်ကြားရေးမှူးချုပ် ဦးကျော်ကျော်လွင်မှ မျက်မြင်လက်တွေ့ပြသရင်း သစ်တောထိန်းသိမ်းဆောင်ရွက်မှုများကို ရှင်းပြပါသည်။

“လူတွေက ကျွန်တော်တို့တွေကို သစ်ထုတ်တယ်၊ သစ်ထုတ်လို့ သစ်တောပြုန်းတီးမှုတွေဖြစ်ပြီး သဘာဝဘေးအန္တရာယ်တွေ ကျရောက်တယ်လို့ ပြောကြတယ်။သစ်တောဝန်ထမ်းတွေရှိပြီး သစ်ခိုးထုတ်တာတွေ မကာကွယ်နိုင်ဘူး၊ ပိုင်ရှင်မဲ့ သစ်တွေသာဖမ်းမိတယ်လို့ ပြောနေကြတယ်။ ပဲခူးတိုင်းဒေသ ကြီးမှာ သဘာဝနယ်မြေ ကြိုးဝိုင်းတော (၁၀၁) ခုရှိပြီး၊ ဧရိယာ (၃၀၆၁၉၃၉) ဧက၊ ကြိုးပြင်ကာကွယ်တော (၈) ခု၊ (၆၄၁၃၁၀) ဧက၊ သဘာဝထိန်းသိမ်းရေး နယ်မြေ (၂) ခု၊ (၂၆၈၅၃၈) ဧက စုစုပေါင်းသစ်တောမြေဧရိယာဟာ (၃၉၇၁၇၈၇) ဧက ရှိပါတယ်။ ကျွန်တော်တို့ရဲ့ သစ်တောနယ်မြေတာဝန်ခံ ၀န်ထမ်းတွေတော့(၅၇၉) ဦးခန့် ရှိပါတယ်။ ဒါကြောင့် ၀န်ထမ်းတစ်ဦးစီဟာ ပျမ်းမျှသစ်တောမြေ ဧရိယာ (၇၀၀၀) ဧကခန့်စီ ကို ထိန်းသိမ်းစောင့်ရှောက်နေ ပါတယ်။ တောထဲမှာသစ်ခိုးခုတ်တဲ့ အသံကြားနေရတယ်။ အဲ့ဒီခုတ်တဲ့အသံရှိတဲ့နေရာကို သွားရတဲ့ခရီးကအဝေးကြီးပါ။ လွယ်လွယ်ကူကူသွားရောက်လို့ မရပါဘူး၊ ဒါကြောင့် ကျွန်တော်တို့အဖွဲ့တွေ သစ်ခိုးထုတ်တဲ့နေရာရောက်တဲ့အချိ်န်မှာ သစ်ခိုးထုတ်တဲ့သူတွေကို မတွေ့ရတော့ဘဲ ရှောင်ပြေးကုန်တာကြောင့် ပိုင်ရှင်မဲ့သစ်တွေကိုသာ ဖမ်းမိနေရတာ” ဟု ဆိုသည်။ ဒါ့အပြင် “သစ်ခိုးခုတ်တဲ့သူတွေက ပုရွက်ဆိတ်တွေလိုဘဲဗျ။ သစ်တွေကို အပိုင်းပိုင်းလေးတွေဖြတ်၊ ဆိုင်ကယ်နဲ့သယ်ကြတာ၊ ဆိုင်ကယ်တစ်စီးမှာ သစ်တုံးလေးတွေ (၁၀) တုံးပါရင်၊ ဆိုင်ကယ်အစီးပေါင်းရာချီကာ ထပ်ခါထပ်ခါသယ်နေရင်အများကြီးလေ။ ဆိုင်ကယ်လည်း လိုင်စင်မဲ့တွေ၊ ဖမ်းတဲ့အခါ ဆိုင်ကယ်နဲ့သစ်တွေ ထားပြီးထွက်ပြေးကြတယ်။ တစ်ခါလွတ်သွားရင် လိုင်စင်မဲ့ဆိုင်ကယ် နောက်ထပ် (၃) စီးလောက် ၀ယ်လို့ရတာကြောင့် လက်လွတ်ထွက်ပြေးကြတယ်” ဟု ပြောပြသဖြင့် ပိုင်ရှင်မဲ့သစ်များ၏ တစ်စိတ်တစ်ဒေသကိုသိရသည်။

“ကျွန်တော်တို့က သစ်ထုတ်လုပ်တဲ့အခါမှာ အောက်ခြေ (၄)ပေ (၆)လက်မအမြင့်ကနေ လုံးပတ်ကိုတိုင်းတယ်၊ အပင်လုံးပတ် (၆)ပေ (၆) လက်မရှိတဲ့ အပင်တွေကိုဘဲ ထုတ်လုပ်ဖို့ရွေးချယ်ပါတယ်။ သတ်မှတ်ထားတဲ့လုံးပတ်မပြည့်ရင် မထုတ်ပါဘူး။ သစ်တောတစ်ခုမှာ သစ်တစ်ခါထုတ်ပြီး နောက်တစ်ခါ ပြန်ထုတ်ဖို့ဆိုရင် နှစ် (၃၀) စောင့်ရပါတယ်။ ဒီအတောအတွင်းမှာ ကျွန်းပင်တွေရဲ့ အလေ့ကျပြန်ပေါက်တဲ့ အပင်တွေနဲ့ ဆက်လက်ပြန်လည်ကြီးပြင်း ရှင်သန်နေတာကြောင့် သစ်တောကြီးတွေဟာ လုံးဝပြုန်းတီးသွားတာမျိုးမရှိပါဘူး” ဟု သူကဆိုသည်။ ယခုကျွန်တော်တို့ ဖြတ်သန်းမောင်းနှင်လာခဲ့သော အုတ်တွင်း၊ ပေါက်ခေါင်းလမ်းတွင် အုတ်တွင်းမှ ပေါက်ခေါင်းသို့အသွား (၂၅) မိုင်နှင့် ပေါက်ခေါင်းမှ အုတ်တွင်းသို့ အသွား (၂၅) မိုင်၊ စုစုပေါင်း (၅၀) မိုင်ခန့်တွင် ကျေးရွာများအဆက်မပြတ်ရှိခြင်း၊ လယ်မြေ၊ ယာမြေ၊ စားကျက်မြေများဖြင့် ရှိနေခြင်းကြောင့် သစ်တောများပျောက်ကွယ်သွားသော်လည်း ကျန် (၇၅) မိုင်၊ အနံအကျယ်အ၀န်းတွင် သစ်တောကြီးများကို ထူထပ်စွာတွေ့မြင်ခဲ့ရသည်။

ကျွန်တော်လည်း ရှုရပ်တဲအောက်တွင် မျက်စိတစ်ဆုံးမြင်ရသော သစ်တောများကို ကြည့်ရှုကြည်နူး မိရင်း အားမလိုအားမရဖြစ်လာ၍ ပေ (၂၀) ခန့်မြင့်သော မျှော်ကြည့်စင်ပေါ်သို့ တက်ကြည့်ပါသည်။ သစ်တောဦးစီးဌာန၏ ကြိုးပမ်းဆောင်ရွက်မှုများကို မျက်မြင်တွေ့ရှိမှုနှင့်အတူ သူတို့၏ဆောင်ရွက်မှု များအပေါ် လေးစားချီးကျူးမိသည်။

ရှုရပ်မှတဆင့် ဆက်လက်ထွက်ခွာလာခဲ့ရာ မိုင်တိုင် (၄၃) တွင် သစ်တောဦးစီးဌာနမှ စည်သူဖြိုး ကုမ္ပဏီသို့ နှစ် (၃၀) စိုက်ပျိုးခွင့်ပြုပေးထားသော ကျွန်းစိုက်ခင်း (၂၆၀၀) ဧကအနက် (၇၅) ဧကအတွင်း   သဘာဝအခြေခံခရီးသွားလုပ်ငန်းကိုဖော်ဆောင်ကာ လာရောက်လေ့လာလည်ပတ်မည့် ပြည်တွင်း /ပြည်ပ ဧည့်သည်များအတွက် တည်းခိုနေထိုင်စားသောက်မှုများ အဆင်ပြေစေရန်စီစဉ်ထားသည့် Bago Eco-Resort သို့ ရောက်ရှိကြပါသည်။

Bago Eco-Resort တွင် သစ်ပင်၊ ၀ါးပင်များကို ထိခိုက်စေခြင်းမရှိဘဲ ရှောင်ကွင်း၍ အဆောက်အဦများ၊ လမ်းများ၊ တံတားများကို ပြုလုပ်ဖန်တီး တည်ဆောက်ကာ သဘာဝကို ထိန်းသိမ်းထားသည့် ပုံစံဖြင့် ပြသဆွဲဆောင်ထားပါသည်။ အဆောက်အဦများကို ကျွန်းစိုက်ခင်းမှ ပင်ကြပ်များခုတ်၍ ဖန်တီးတီ ထွင်ထည့်သွင်းထားသဖြင့်၊ လှလည်းလှ၊ အမြင်လည်းဆန်း၊ ဂေဟစနစ်လည်း ပျက်စီးမှုမရှိအောင် တစ်ချက်ခုတ် သုံးချက်ပြတ် ဆောင်ရွက်ထားသည် ကိုတွေ့ရှိရပါသည်။

အဆိုပါ Resort တွင် ကျွန်းတောများအတွင်း၊ စက်ဘီးစီးခြင်း၊ ဆင်စီးခြင်း၊ ငှက်ကြည့်ခြင်း၊ ကရင်တိုင်းရင်းသားများ၏ ဓလေ့ထုံးတမ်းစဉ်လာများ လေ့လာခြင်း၊ တောတွင်းလမ်းလျောက်ခြင်း၊ ဆင်စခန်းများသို့သွားရောက်၍ ရေချိုးပေးခြင်း အစာကျွေးခြင်း၊ တောတွင်းရှိ ဇီဝမျိုးကွဲများ လေ့လာခြင်း၊ အမှတ်တရ ကျွန်းပင်များစိုက်ပျိုးခြင်းများကို ပြုလုပ်နိုင်ရန် ပြင်ဆင်ဆောင်ရွက်နေပြီး။ လာမည့်ဇူလိုင်လကုန်တွင် စတင်ဖွင့်လှစ်မည်ဖြစ်ကြောင်း သိရှိရပါသည်။

Bago yoma Eco-Resort ၏ Eco Tourism နှင့် တစ်ဆက်တစ်စပ်တည်းပင် ပြည်မြို့တောင်ဘက် (၆) ဖာလုံအကွာ ရန်ကုန်-ပြည်ကားလမ်းပေါ်တွင် (၁၈၅၇) ခုနှစ်က ဂျာမန်ပညာရှင် ဒေါက်တာ ဘရန်းဒစ် စိုက်ပျိုးခဲ့သည့် နှစ် (၁၆၀) သက်တမ်းရှိ၊ ကျွန်းပင်ကြီးများတည်ရှိရာ ကျွန်းစိုက်ခင်း (၇၈) ဧကကို ခြေလျင်တောင်တက် ခရီးဖြင့်ကြည့်ရှုနိုင်သလို ပြည်မြို့မှ (၅) မိုင်အကွာ၊ နတ်မှော်ဆင်စခန်းတွင်လည်း၊ ဆင်သရုပ်ပြမှုအား ကြည့်ရှုနိုင်ခြင်း၊ ဆင် စာကျွေးနိုင်ခြင်း၊ ဆင်စီးနိုင်ခြင်း၊ ဧရာဝတီမြစ်ကမ်းတစ်လျောက် ဆင်စီး၍ သဘာဝပတ်ဝန်းကျင်များကိုကြည့်ရှု့ကာ သန့်ရှင်းသောလေအား တ၀ကြီး ရှုရှိုက်နိုင်ခြင်း၊ ဧရာဝတီမြစ်အတွင်း မော်တော်ယာဉ်ဖြင့် လည်ပတ်စီးဆင်းနိုင်ခြင်းတို့ကို ဆောင်ရွက်နိုင်ရန် သစ်တောဦးစီးဌာနမှ ပြင်ဆင်ဆောင်ရွက် ထားပါသည်။ ထို့ပြင် နတ်မှော်ဆင်စခန်းနှင့် တစ်ဆက်တည်းပင် ပုဂံယဉ်ကျေးမှုထက် နှစ် (၆၀၀) ခန့် စောခဲ့သော A.D (၅) ရာစုတွင် မြို့ပြနိုင်ငံတည်ထောင်ခဲ့ သည့် ကမ္ဘာ့ယဉ်ကျေးမှု အမွေအနှစ်စာရင်းဝင် ပျူ၊ သရေခေတ္တရာမြို့ဟောင်း၏ ယဉ်ကျေးမှုများကိုလည်း လေ့လာနိုင်ပါသည်။

နတ်မှော်ဆင်စခန်းရှိ ရှင်းလင်းဆောင်တွင် ပဲခူးတိုင်းသစ်ထုတ်လုပ်ရေး၊ ဒုတိယအထွေထွေမန်နေဂျာ ဦးထွန်းထွန်းဦးမှ ဆင်များ၏အမူအကျင့်များကို ရှင်းပြရာ အလွန်ပင်စိတ်ဝင်စားဖွယ်ကောင်းခဲ့ပြီး၊ကြမ်းတမ်းကြံ့ခိုင်လှသော ဆင်များ၏ ခံစားတတ်သော နူးညံ့သည့် စိတ်သဘောထားများကို သိခဲ့ရသည်။

“ကျွန်တော်တို့ သစ်ထုတ်လုပ်ငန်းမှာ ဆင်ဦးစီးတွေရဲ့ မျိုးဆက်တွေဟာ ဆင်ဦးစီးထိန်းသိမ်းတဲ့ ဆင်တွေရဲ့ မျိုးဆက်တွေအပေါ်မှာလည်း ငယ်ငယ်က တည်းက ထိန်းသိမ်းစောင့်ရှောက်ပြီး ဆင်ဦးစီးတွေအဖြစ် ဆက်လက်အမွေဆက်ခံကြတယ်။ ဒီလို ငယ်ငယ်ကတည်းက လူနဲ့ဆင် အတူသွား၊ အတူလာ၊ အတူနေထိုင်ကြီးပြင်းခဲ့ကြတဲ့ သံယောဇဉ်ကြောင့် ဆင်ဦးစီးတစ်ယောက်အရွယ်ရောက်လို့မင်္ဂလာဆောင်မယ့်အချိန်မှာ ဆင်ဦးစီးထိန်းသိမ်းရတဲ့ဆင်ဟာ မင်္ဂလာပွဲပြုလုပ်မယ့်အခမ်းအနားကို ဖျက်စီးတာကြုံခဲ့ဘူးတယ်။ သူ သဘောမကျကြောင်းပြတာပေါ့ဗျာ” ဟု ဆင်ဦးစီးနှင့်ဆင်တို့၏ သံယောဇဉ်ကြီးမား ဆက်နွယ်ပုံကို သိရှိရခြင်းကြောင့် ဆင်များအပေါ်ပို၍ ဂရုဏာဖြစ်မိသည်။

ယခုအခါ ဆင်များကို အစွယ်၊ နှာမောင်း၊ အရေခွံ၊ အသား၊ ခွာစသည့်တစ်ကိုယ်လုံးကို ၀ယ်ယူသည့်ဈေးကွက်အပြင် ဆင်ကိုမီးရှို့ပြီးရရှိလာသောပြာကို ပင်ဝယ်ယူနေသည့်အတွက် တောဆင်ရိုင်းများ၊အသက်ရှင်နေထိုင်နိုင်ရေးမှာ စိန်ခေါ်မှုတစ်ခုအဖြစ် ရင်ဆိုင်နေရသည်။ စောင့်ရှောက်ကာကွယ်မှုကြားမှပင် ဆင်များကို ဖမ်းဆီးသတ်ဖြတ်ရောင်းချနေမှုကြောင့် မြန်မာနိုင်ငံတွင် တောဆင်ရိုင်း (၃၀၀၀)ခန့်၊ သစ်ထုတ်လုပ်ရေးဆင် (၃၀၀၀)ခန့်နှင့် ပုဂ္ဂလိကပိုင်ဆင် (၂၅၀၀) ခန့်သာကျန်ရှိတော့ကြောင်း သိရှိရပါသည်။

ကျွန်တော်တို့အဖွဲ့ ပြည်မှ နေပြည်တော်သို့ အပြန်ခရီးကတော့ စတုတ္ထရိုးမဖြတ်လမ်းဖြစ်သည့် ကိုးပင်- သာဂရ ဖြတ်လမ်းမှ ပြန်လာခဲ့ပြီး၊ လမ်းခရီးတွင် ဖိုးကျားဆင်စခန်းရှိသော်လည်း အဆိုပါ ဆင်စခန်းသို့ ရောက်ရှိချိန်တွင် ည (၇း၀၀) နာရီကျော်ပြီမို့ မ၀င်ဖြစ်တော့။ သစ်တောဦးစီးဌာနအဖွဲ့ကတော့ ပန်း တင်၊ ပျဉ်းမနားလမ်းမှ ပြန်လည်ထွက်ခွာသွားခဲ့ကြပါသည်။

မြန်မာနိုင်ငံတွင် သဘာဝသစ်တောကြီးများ၊ သဘာဝရေအိုင်ကြီးများ၊ သဘာဝတောရိုင်းတိရစ္ဆာန်များ၊ ရုက္ခဗေဒနှင့် ဇီဝဗေဒမျိုးစုံ/ မျိုးကွဲများဖြင့် စုံလင်၊ နက်ရှိုင်းစွာတည်ရှိနေပြီး၊ အဆိုပါသဘာဝတရားများကိုထိန်းသိမ်းကာ သဘာဝအခြေခံခရီးသွားဒေသများအဖြစ် သတ်မှတ်၍ထိန်းသိမ်းကာ ကွယ်စောင့်ရှောက်နေသည့် သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာနနှင့် ခရီးသွားလုပ်ငန်းဖွံ့ဖြိုးတိုးတက်ရေးအတွက် ဆောင်ရွက်နေသည့် ဟိုတယ်နှင့်ခရီးသွားလာရေးဝန်ကြီးဌာန နှစ်ခုတို့မှ စိတ်တူကိုယ်တူဖြင့် ပူးပေါင်းဆောင်ရွက်လျက်ရှိပါသည်။ သဘာဝအခြေခံခရီးသွား လုပ်ငန်းတွင်ခရီးသွားလုပ်ငန်းနယ်ပယ်မှ ပုဂ္ဂလိကလုပ်ငန်းရှင်များမှလည်း  ပူးပေါင်းပါဝင်လာရန် အရေးကြီးပြီး၊ ပူးပေါင်းပါဝင် မှု့ကြောင့် သဘာဝအခြေခံ ခရီးသွားလုပ်ငန်း ဖွံ့ဖြိုးမှုရှိစေသည့်အပြင် သစ်ခိုးထုတ်ခြင်း၊ တောရိုင်းတိရစ္ဆာန်များ သတ်ဖြတ်ခြင်း၊ ဂေဟစနစ်များ ယိုယွင်းပျက်စီးခြင်း၊ ဇီဝမျိုးစုံ၊ မျိုးကွဲများ ပျောက်ကွယ်ခြင်း၊ သဘာဝဘေးများ ကျရောက်ခြင်း စသည်တို့ကို လျော့ပါးစေမည်ဖြစ်ပါသည်။

သဘာဝအခြေခံခရီးသွားလုပ်ငန်းဖြင့် သဘာဝတရားကြီးနှင့်အတူ ဂေဟစနစ်များကိုပါ ထိန်းသိမ်းနိုင်သည့် အခွင့်အလမ်းကောင်းများ၊ များစွာရှိနေသော်လည်း အကျိုးရှိစွာ အသုံးပြုနိုင်ခြင်းမရှိပါက အချည်းအနှီးမဲ့ဖြစ်နေတတ်ပါသည်။ ယခုအခါ သဘာဝအခြေခံခရီးသွားလုပ်ငန်းဖြင့် နိုင်ငံ့အကျိုး၊ ဒေသအကျိုး၊ ဒေသနေပြည်သူလူထုအကျိုး၊ မိမိအကျိုးများ ရရှိလာမှုမြင့်မားလာခြင်းကြောင့် သဘာဝအခြေခံခရီးစဉ်ဒေသများအတွင်း လိုအပ်နေသည့် ဟိုတယ်/တည်းခိုခန်းeco- Lodges များ၊ ဧည့်ရိပ်သာများနှင့်အတူတည်းခိုနေထိုင်စားသောက်ဆိုင်များ၊ဆင်စခန်းများကို ပုဂ္ဂလိကစီးပွားရေးလုပ်ငန်းရှင်များမှ တဖြည်းဖြည်းပါဝင်လှုပ်ရှား ချဉ်းနင်းဝင်ရောက်လာနေကြပြီဖြစ်ပါသည်။

သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာနနှင့် ဟိုတယ်နှင့်ခရီးသွားလာရေး ၀န်ကြီးဌာနတို့သည်သဘာဝအခြေခံခရီးစဉ်ဒေသ များအား အသုံးပြု၍ ခရီးသွားလုပ်ငန်းဆောင်ရွက်လိုသည့် လုပ်ငန်းရှင်များအပေါ် လိုအပ်သောပံ့ပိုး၊ ကူညီ၊ အားပေး၊ ဖြည့်ဆည်းမှုများဖြင့်  ပူးပေါင်းဆောင် ရွက်ရန် အသင့်ရှိနေကာလက်ကမ်းကြိုဆိုဖိတ်ခေါ်လျက်ရှိနေပါသည်။ ၀န်ကြီးဌာနနှစ်ခု၏ တံခါးနှစ်ချပ်မှာ ခရီးသွားလုပ်ငန်းများအတွက် အမြဲတစေဖွင့် ထားပြီးဖြစ်၍ သဘာအခြေခံခရီးသွားလုပ်ငန်းဖြင့် ဆောင်ရွက်လိုသော လုပ်ငန်းရှင်များအား နွေးထွေးစွာဖြင့် အသင့်ကြိုဆိုလျက်ရှိပါကြောင်း တင်ပြလိုက်ရပါသည်။

၇.၇.၂၀၁၇