နေပြည်တော်၊ဖေဖော်ဝါရီ (၅) ရက်

ကယားပြည်နယ်အစိုးရအဖွဲ့နှင့် ဟိုတယ်နှင့်ခရီးသွားညွှန်ကြားမှုဦးစီးဌာန၊ ကယားပြည်နယ်၊ လွိုင်ကော်ရုံးခွဲတို့၏ ဖိတ်ကြားမှု၊ ရန်ကုန်အခြေစိုက် Nature Dream Travels & Tours နှင့် ကယားပြည် နယ် အခြေစိုက် Meticulous Myanmar Travel & Tours တို့၏ စီစဉ်မှုဖြင့် ကယားပြည်နယ် ခရီးသွား မြှင့်တင်ရေးအတွက် ရုရှားနိုင်ငံသား(၃၀)ဦး ပါဝင်သောအဖွဲ့သည် (၃-၂-၂၀၁၉) ရက်နေ့တွင်    ကယားပြည်နယ်သို့ ရောက်ရှိလာရာ လွိုင်ကော်လေဆိပ်တွင် ကယားပြည်နယ်၊ စီမံကိန်းနှင့်ဘဏ္ဍာရေး ၀န်ကြီးဌာန၀န်ကြီး ဦးမော်မော်နှင့် ဟိုတယ်နှင့်ခရီးသွားညွှန်ကြားမှုဦးစီးဌာန၊ လွိုင်ကော်ရုံးမှ ပြည်နယ် တာဝန်ခံ ဦးလင်းဇော်ထွဋ် တို့မှ တိုင်းရင်းသားအကအဖွဲ့များဖြင့် ကြိုဆိုနှုတ်ဆက်ခဲ့ကြပါသည်။

 

၎င်းနောက် အဆိုပါခရီးသွားဧည့်သည်များသည် လူထုအခြေပြုခရီးသွားလုပ်ငန်း (CBT)ကျေးရွာ များဖြစ်သော တနီးလာလဲကျေးရွာနှင့်ပန်ပက်ကျေးရွာ၊ကယားပြည်နယ်၏ အထင်ကရနေရာများဖြစ်သော ငွေတောင်ဆည်၊သီရိမင်္ဂလာတောင်ကွဲစေတီ၊ရွှေလက်ဝါးစေတီ၊ထီးပွင့်ကန်၊ကန္ဒရ၀တီဟော်နန်းနှင့်ကြတ်ဂူများသို့ သွားရောက်လည်ပတ်ခဲ့ကြပါသည်။

ထို့နောက် (၄-၂-၂၀၁၉) ရက်နေ့တွင်လည်း လွိုင်ကော်မြို့၊ ဘီလူးချောင်းရေလမ်းကြောင်းမှ တစ်ဆင့် မိုးဗြဲ ရေတံခါးသို့ ဖြတ်သန်းပြီး ဖယ်ခုံ- စံကား- အင်းလေးခရီးစဉ်အား သွားရောက်ခဲ့ပြီး ရှမ်းပြည်နယ်၊ အင်းလေးဒေသနှင့် လွိုင်ကော်မြို့သို့ အပြန်အလှန်သွားရောက်လည်ပတ်နိုင်ခဲ့ကြပါကြောင်း သတင်းရရှိပါသည်။