နေပြည်တော် ၊ နိုဝင်ဘာလ (၈) ရက်

ဧရာဝတီတိုင်းဒေသကြီးအတွင်း အဆင့်မီ အများပြည်သူသုံးသန့်စင်ခန်းများ ဖြစ်ပေါ်စေရေး ဆွေးနွေးပွဲကို မြန်မာ့ရေနံထွက်ပစ္စည်းရောင်းဝယ်ရေးလုပ်ငန်း၊ တိုင်းဒေသကြီးရုံးတွင် (၆-၁၁-၂၀၁၈) ရက်နေ့၊ မွန်းလွဲ (၁) နာရီအချိန်တွင် ကျင်းပပြုလုပ်ခဲ့ရာ ဟိုတယ်နှင့်ခရီးသွားညွှန်ကြားမှုဦးစီးဌာန (တိုင်းတာဝန်ခံ) ဒုတိယညွှန်ကြားရေးမှူးနှင့် မြန်မာ့ရေနံထွက်ပစ္စည်း ရောင်းဝယ်ရေးလုပ်ငန်း (တိုင်းတာဝန်ခံ)၊ စက်သုံးဆီ အရောင်းဆိုင်များမှ လုပ်ငန်းရှင်များ၊ မန်နေဂျာများ တက်ရောက်ဆွေးနွေးခဲ့ပါ သည်။

 

 

 

 

 

ဆွေးနွေးပွဲတွင် မြန်မာ့ရေနံထွက်ပစ္စည်းရောင်းဝယ်ရေးလုပ်ငန်း(တိုင်းတာဝန်ခံ)မှ အဖွင့်အမှာ စကား ပြောကြားပြီး ဟိုတယ်နှင့်ခရီးသွားညွှန်ကြားမှုဦးစီးဌာန (တိုင်းတာဝန်ခံ) ဒုတိယညွှန်ကြားရေးမှူးက ရန်ကုန်- ပုသိမ်ကားလမ်းသည် ကားမောင်းချိန် (၄)နာရီခန့်သာကြာမြင့်သဖြင့် ပြည်တွင်း၊ ပြည်ပခရီးသွား ဧည့်သည်များလမ်းခရီးတွင် ကျန်းမာရေးကိစ္စများဆောင်ရွက်ရန် လိုအပ်ချက်များရှိနေဆဲဖြစ်ကြောင်း၊ နည်းလမ်း တစ်ရပ်အနေဖြင့် လမ်းတစ်လျှောက်ရှိ စက်သုံးဆီအရောင်းဆိုင်များတွင် အများပြည်သူ အသုံးပြုနိုင်သော သန့်စင်ခန်းများအား အဆင့်မြှင့်တင်ပြီး ထင်သာမြင်သာရှိသော ဆိုင်းဘုတ်များဖြင့် နွေးထွေးပျူငှာစွာ ဖိတ်ခေါ်ဝန်ဆောင်မှုပေးရန် လိုအပ်ပါကြောင်း၊ စက်သုံးဆီအရောင်းဆိုင်များအနေဖြင့် ဈေးနှုန်းမှန်ကန်ခြင်း၊ အချင်အတွယ်ပြည့်ဝခြင်း၊ စက်သုံးဆီအရည်အသွေးကောင်းမွန်ခြင်းးများသည် အဓိက လိုအပ်ချက်ဖြစ်သော်လည်း ဆက်စပ်သော ဝန်ဆောင်မှုအဖြစ် သန့်စင်ခန်းများသန့်ရှင်းခြင်း၊ အဆင့်အတန်းမီခြင်းများသည်လည်း မိမိတို့လုပ်ငန်းကို အထောက်အကူပြုစေသည့်အပြင် တိုင်းဒေသကြီး ၏ ခရီးသွားလုပ်ငန်းပုံရိပ်ကိုပါ တိုးတက်စေနိုင်မည်ဖြစ်ပါကြောင်း၊ ရန်ကုန်- ပုသိမ် ကားလမ်းတစ်လျှောက် ရှိ စက်သုံးဆီရောင်းဆိုင်လုပ်ငန်းရှင်များမှ ပူးပေါင်းဆောင်ရွက်ပေးစေလိုပါကြောင်း ဆွေးနွေးခဲ့ပြီး စက်သုံးဆီအရောင်းဆိုင်များတွင် ထားရှိရမည့် ဆိုင်းဘုတ်နမူနာပုံစံများအား ဖြန့်ဝေပေးခဲ့ပါသည်။

 

 

 

 

 

 

ထို့နောက် ဆွေးနွေးပွဲသို့ တက်ရောက်လာကြသော စက်သုံးဆီအရောင်းဆိုင်များမှ တာဝန်ရှိသူ များက သိရှိလိုသည်များကို မေးမြန်းပြီး တိုင်းဒေသကြီးတာဝန်ခံမှ ပြန်လည်ဆွေးနွေးခဲ့ပါသည်။

ဆွေးနွေးပွဲသို့ တိုင်းဒေသကြီးအတွင်းရှိ စက်သုံးဆီအရောင်းဆိုင်ပေါင်း (၂၈) ဆိုင်မှ ကိုယ်စားလှယ်များ တက်ရောက်ခဲ့ပြီး အဝေးပြေးကားလမ်းတစ်လျှောက်ရှိ အဆင့်မီအများပြည်သူသုံး သန့်စင်ခန်းများ ဖြစ်ပေါ်စေရေးကို အလျင်အမြန် အကောင်အထည်ဖော်ဆောင်ရွက်သွားမည်ဖြစ်ပါ ကြောင်း သတင်းရရှိပါသည်။