ရန်ကုန်၊ နိုဝင်ဘာလ (၂၆)ရက်

ဟိုတယ်နှင့်ခရီးသွားလာရေးဝန်ကြီးဌာန၊ ပြည်ထောင်စုဝန်ကြီး ဦးအုန်းမောင်သည် ယနေ့ နံနက်ပိုင်းတွင် ရန်ကုန်မြို့၊ ခရီးသွားလုပ်ငန်းနှင့် ဧည့်ဝန်ဆောင် မှု သင်တန်းကျောင်း၌ ပြုလုပ်သည့် Digital Marketing ဆိုင်ရာ မဟာဗျူဟာနှင့် လုပ်ငန်းစဉ်များ ပိုမိုကောင်းမွန်စေရေး ဒုတိယအကြိမ်မြောက် လုပ်ငန်းညှိနှိုင်း အစည်းအဝေးသို့ တက်ရောက်ပါသည်။

အစည်းအဝေး၌ ပြည်ထောင်စုဝန်ကြီးမှ အမှာစကားပြောကြားရာတွင် Digital Marketing ဆိုင်ရာမဟာဗျူဟာနှင့် လုပ်ငန်းစဉ်များ ပိုမိုကောင်းမွန်စေရေး ပထမအကြိမ်မြောက် လုပ်ငန်းညှိနှိုင်း အစည်းအဝေးကို (၁၂-၁၁-၂၀၁၈) ရက်နေ့တွင် ကျင်းပခဲ့ပြီး၊ ယခုပြုလုပ်သည့် အစည်းအဝေးသည် ဒုတိယအကြိမ်မြောက် လုပ်ငန်းညှိနှိုင်း အစည်းအဝေးဖြစ်ကြောင်း၊ မြန်မာနိုင်ငံခရီးသွားလုပ်ငန်း ပိုမို ဖွံ့ဖြိုး တိုးတက်ရန်အတွက် Digital နည်းပညာကို အသုံးပြုပြီး ခရီးသွားမြှင့်တင်ရေး လုပ်ငန်း ဆောင်ရွက်ရန် အတွက် ဒေသနှင့်နိုင်ငံအလိုက် ဦးစားပေးဆောင်ရွက်နိုင်ရန်အတွက် လုပ်ငန်းကော်မတီ အဖွဲ့ (၆)ဖွဲ့ ဖွဲ့စည်းပြီးဖြစ်သည့်အပြင် ၀န်ကြီးဌာန၊ ပုဂ္ဂလိက ပူးပေါင်းပါဝင်သည့် Digital Marketing Taskforce ကို Digital Marketing Advisory Team ၊ Digital Marketing Committee နှင့် Digital Marketing Implementation Team စသည့် အဖွဲ့ (၃)ဖွဲ့ ပါဝင်ဖွဲ့စည်းဆောင်ရွက်လျက်ရှိပြီး လုပ်ငန်းအတွက် လိုအပ်သည့် နည်းပညာဆိုင်ရာ အကူအညီကို နယ်သာလန်နိုင်ငံအခြေစိုက် Center for the Promotion of Imports  from Developing Countries (CBI) အဖွဲ့အစည်းမှ ကူညီဆောင်ရွက်ပေးလျက်ရှိပါ ကြောင်း၊ ၂၀၁၈-၂၀၁၉ ဘဏ္ဍာနှစ်အတွင်း ခရီးသွားမြှင့်တင်ရေးဆိုင်ရာ Digital Marketing လုပ်ငန်းများ အတွက် ဆောင်ရွက်ရမည့် ရည်မှန်းချက်၊ Target Market အလိုက်ဆောင်ရွက်ရမည့် လုပ်ငန်းစဉ်များ၊ ငွေကြေးခွဲဝေသုံးစွဲရမည့် ကိစ္စရပ်များကို စနစ်တကျဖြင့် သတ်မှတ်ကာလအတွင်း ဆောလျင်စွာအကောင် အထည်ဖော်နိုင်ရေးအတွက် ဝိုင်းဝန်းဆွေးနွေးသွားရန် လိုကြောင်းပြောကြားပါသည်။

ထိုနောက် တက်ရောက်လာကြသော ဒေသနှင့် နိုင်ငံအလိုက် ခရီးသွားလုပ်ငန်းဖွံ့ဖြိုးတိုးတက်ရေး ကော်မတီ (၆) ခုမှ ဝိုင်းဝန်းအကြံပြုဆွေးနွေးကြပြီး နယ်သာလန်နိုင်ငံအခြေစိုက် Center for the Promotion of Imports from Developing Countries (CBI) အဖွဲ့အစည်း၏ ကျွမ်းကျင်ပညာရှင်မှ Digital Marketing ဆိုင်ရာမဟာဗျူဟာ လုပ်ငန်းစဉ်များပိုမိုကောင်းမွန်စေရေးနှင့် ပတ်သက်၍ ရှင်းလင်း တင်ပြခဲ့ပါသည်။ ထိုနောက် ပြည်ထောင်စုဝန်ကြီးမှ နိဂုံးချုပ် အမှာစကားပြောကြားခဲ့ပြီး လိုအပ်သည်များ ပေါင်းစပ်ညှိနှိုင်း ဆွေးနွေး ဆောင်ရွက်ပေးခဲ့ပါသည်။

အစည်းအဝေးသို့ ဟိုတယ်နှင့်ခရီးသွားညွှန်ကြားမှုဦးစီးဌာနမှ ဌာနဆိုင်ရာ တာဝန်ရှိသူများ၊ မြန်မာနိုင်ငံခရီးသွားလုပ်ငန်းအဖွဲ့ချုပ်နှင့် ညီနောင်အသင်းများမှ တာဝန်ရှိသူများ၊ ခရီးသွားလုပ်ငန်း ဖွံ့ဖြိုးတိုးတက်ရေးအတွက် ဖွဲ့စည်းထားသည့် လုပ်ငန်းကော်မတီအဖွဲ့ (၆) ဖွဲ့နှင့် Digital Marketing Advisory Team ၊ Digital Marketing Committee နှင့် Digital Marketing Implementation Team များ မှ တာဝန်ရှိသူများ စုစုပေါင်း (၆၀) ဦးခန့် တက်ရောက်ခဲ့ကြကြောင်း သတင်းရရှိပါ သည်။