နေပြည်တော် ၊ ဒီဇင်ဘာ (၆)

ဟိုတယ်နှင့်ခရီးသွားလာရေးဝန်ကြီးဌာန၏ ကြီးကြပ်မှု ၊ Tint Tint Myanmar Group of Companies တို့၏ စီစဉ်ဆောင်ရွက်မှုဖြင့် ကမ္ဘာလှည့်ခရီးသည် (၁၅၉၂) ဦး ၊ သင်္ဘောဝန်ထမ်း (၁၉၆၁) ဦး ပါဝင်သော Genting  Dream Star Cruise အပျော်စီးသင်္ဘောသည် နိုဝင်ဘာလ (၂၇) ရက်နေ့ နံနက် (၉း၂၀) နာရီတွင် ကော့သောင်း ခရိုင် ၊ မြိတ်ကျွန်းစုရှိ ခက်ရင်းခွကျွန်းသို့ ဆိုက်ရောက်ခဲ့ပါသည်။

အဆိုပါသင်္ဘောဆိုက်ကပ်ရောက်ရှိချိန်တွင် ဟိုတယ်နှင့်ခရီးသွားလာရေးဝန်ကြီးဌာနမှ အမြဲတမ်း အတွင်းဝန် ဦးရည်မွန် ၊ကော့သောင်းခရိုင် အထွေထွေ အုပ်ချုပ်ရေးမှူး ဦးနေဦး ၊ ခရိုင်အဆင့်ဌာနဆိုင်ရာများ နှင့် Tint Tint Myanmar Group of Companies မှ တာဝန်ရှိသူများက ကြိုဆိုနှုတ်ဆက်ကြပြီး သင်္ဘော ပေါ်တွင် နိုင်ငံပေါင်း (၂၅) နိုင်ငံမှ ကမ္ဘာလှည့်ခရီးသည်များပါဝင်ကာ ထိုင်းနိုင်ငံ ၊ ဖူးခက်ဆိပ်ကမ်းမှ  မြန်မာ နိုင်ငံ မြိတ်ကျွန်းစုရှိ ခက်ရင်းခွကျွန်းသို့ ပထမဆုံးအကြိမ် ၀င်ရောက် လည်ပတ်ခြင်းဖြစ်ပြီး အဆိုပါသင်္ဘော သည် ညနေ (၆း၃၀) နာရီတွင် စင်္ကာပူနိုင်ငံသို့ ဆက်လက်ထွက်ခွာသွားပါသည်။

ယခုအခါ ကမ္ဘာလှည့်ခရီးသွားဧည့်သည်များသည် ကော့သောင်းခရိုင် ၊ မြိတ်ကျွန်းစုဒေသအတွင်းရှိ ကျွန်းများသို့ ကမ္ဘာလှည့်အပျော်စီးသင်္ဘောကြီး ၊ စက်တပ် ရွက်လှေများဖြင့် ညအိပ်ခရီးစဉ်များနှင့် နေ့ချင်းပြန် ကျွန်းပတ်ခရီးစဉ်များအဖြစ် ၀င်ရောက်လည်ပတ်လျက်ရှိပြီး စိတ်ဝင်စားမှုမြင့်မားလာသော ခရီးစဉ်ဒေသ တစ်ခု ဖြစ်ကြောင်း သတင်းရရှိပါသည်။