ပြည်ထောင်စုဝန်ကြီး ဦးအုန်းမောင်သည် ရှမ်းပြည်နယ်ဒေသဆိုင်ရာ ခရီးသွားလုပ်ငန်းကော်မတီ (၂/၂၀၁၉) အစည်းအဝေးသို့ တက်ရောက်

နေပြည်တော်၊ ဇွန်လ (၁၇) ရက်
ခရီးသွားလုပ်ငန်းကော်မတီဥက္ကဌ၊ ဟိုတယ်နှင့်ခရီးသွားလာရေးဝန်ကြီးဌာန ပြည်ထောင်စုဝန်ကြီး သည် (၁၅.၆.၂၀၁၉) ရက်နေ့၊ နံနက်ပိုင်းတွင် ရှမ်းပြည်နယ်အစိုးရအဖွဲ့ရုံး၌ ကျင်းပပြုလုပ်သော ရှမ်းပြည် နယ်ဒေသဆိုင်ရာခရီးသွားလုပ်ငန်းကော်မတီ (၂/၂၀၁၉) အစည်းအဝေးသို့ တက်ရောက်အမှာစကား ပြောကြားခဲ့ပါသည်။ အစည်းအဝေးသို့ ရှမ်းပြည်နယ်ဒေသဆိုင်ရာ ခရီးသွားလုပ်ငန်းကော်မတီ ဒုတိယက္ကဌ၊ ရှမ်းပြည်နယ် စီမံကိန်းနှင့် ဘဏ္ဍာရေးဝန်ကြီး ဦးစိုးညွန့်လွင်နှင့် ဒေသဆိုင်ရာခရီးသွားလုပ်ငန်း ကော်မတီ အဖွဲ့ဝင်များ၊ GTMH Telecom ကုမ္ပဏီမှ တာဝန်ရှိသူများပါဝင်တက်ရောက်ခဲ့ကြပါသည်။

အစည်းအဝေးတွင် ပြည်ထောင်စုဝန်ကြီးက အသစ်ပြဌာန်းထားခဲ့ပြီးဖြစ်သော မြန်မာနိုင်ငံခရီးသွား လာရေးဥပဒေကို အကျယ်တဝင့်ရှင်းလင်းပြောကြားကြရန်နှင့် လိုအပ်သည်များကို ပေါင်းစပ်ဖြေရှင်းပေး သွားမည်ဖြစ်ပါကြောင်း၊ ယခု ဥပဒေ အသစ်မှာ ဟိုတယ်နှင့်ခရီးသွားလုပ်ငန်းများ တိုင်းဒေသကြီးနှင့် ပြည်နယ်များတွင် ခေတ်စနစ်နှင့်အညီ စနစ်တကျ ဖွံ့ဖြိုးတိုးတက်ရန်နှင့်တစ်နည်းအားဖြင့် တိုင်းဒေသကြီး နှင့် ပြည်နယ်အစိုးရများအား လုပ်ပိုင်ခွင့်ပေးခြင်းဖြစ်ပြီး ဖြစ်ပေါ်လာနိုင်သော အခက်အခဲများအား မိမိတို့ ဒေသနှင့် ပြည်နယ်အဆင့်မှ ဦးစွာဖြေရှင်းပြီး လိုအပ်လာပါက ပြည်ထောင်စုအဆင့်သို့ ဆက်လက် တင်ပြ သွားရန်လိုအပ်ပါကြောင်း၊ မိမိတို့ ဟိုတယ်နှင့်ခရီးသွားလာရေးဝန်ကြီးဌာနအနေဖြင့်လည်း နိုင်ငံခြားသား ခရီးသွားဧည့်သည်များ မြန်မာနိုင်ငံသို့ တိုးတက်ဝင်ရောက်လာရေးအတွက် Look-East policy နှင့် Look-West Policy များ ချမှတ်ကာ visa relaxation များကို သက်ဆိုင်ရာ ပြည်ထောင်စုဝန်ကြီးဌာနများနှင့် ပေါင်းစပ်ပြီး ပြုလုပ်ပေးနေပါကြောင်း၊ ထို့ပြင် ဝန်ကြီးဌာန၌ Digital Marketing Taskforce ဖွဲ့စည်း ထားပြီး Digital Marketing ဆိုင်ရာကိစ္စရပ်များကို အရှိန်အဟုန်ဖြင့် မြှင့်တင်ဆောင်ရွက်လျက်ရှိရာ တိုင်းဒေသကြီး၊ ပြည်နယ်များတွင်လည်း အကောင်အထည်ဖော်ဆောင်ရွက်သွားစေလိုပါကြောင်း၊ ယခု အစည်းအဝေးတွင်လည်း နည်းပညာကုမ္ပဏီတစ်ခုဖြစ်သော GTMH Telecom ကုမ္ပဏီကိုလာရောက်စေပြီး ရှမ်းပြည်နယ်၊ ညောင်ရွှေမြို့၏ ခရီးသွားလုပ်ငန်းစနစ်တကျဖွံ့ဖြိုးတိုးတက်ရေးအတွက် အထောက်အကူ ဖြစ်စေသော နည်းပညာကိစ္စရပ်များကို ကူညီသွားမည့်အစီအစဉ်များ ရှင်းလင်းသွားမည်ဖြစ်ကြောင်း၊ ရှမ်း ပြည်နယ်အတွင်းရှိ ဟိုတယ်နှင့်ခရီးသွားလုပ်ငန်းများ ဥပဒေနှင့်အညီ စနစ်တကျအကောင်အထည်ဖော် ဆောင်ရွက်နိုင်ရေးအတွက် ကြီးကြပ်ဆောင်ရွက်သွားရန်လိုအပ်ပြီး ဒေသတွင်းဟိုတယ်လုပ်ငန်းများ အကောင်အထည်ဖော်ရာတွင် လူထုအခြေပြုခရီးသွားလုပ်ငန်း Community Based Tourism (CBT)ကိုပါ တိုးတက်လာအောင် အကောင်အထည်ဖော်ဆောင်ရွက်သွားရန်လိုအပ်ပါကြောင်း၊ ဟိုတယ်များ စံချိန် စံညွှန်းနှင့်အညီဖြစ်စေရေးအတွက် Star Rating သတ်မှတ်နိုင်ရေး၊ ပြည်တွင်းနှင့် နိုင်ငံတကာမှ ကျွမ်းကျင် ပညာရှင်များခေါ်ယူပြီး ဆောင်ရွက်လျက်ရှိနေပါကြောင်း ပြောကြားခဲ့ပါသည်။

ထို့နောက် ရှမ်းပြည်နယ်ဒေသဆိုင်ရာ ခရီးသွားလုပ်ငန်းကော်မတီဒုတိယဥက္ကဌ၊ ရှမ်းပြည်နယ် စီမံကိန်းနှင့် ဘဏ္ဍာရေးဝန်ကြီး ဉီးစိုးညွန့်လွင်မှ ပြောကြားရာတွင် မိမိတို့အနေဖြင့် ရှမ်းပြည်နယ်ခရီးသွား လုပ်ငန်းများစဉ်ဆက်မပြတ် ဖွံ့ဖြိုးတိုးတက်ရေးအတွက် အထူးအလေးထားဆောင်ရွက်နေပါကြောင်း၊ ခရီးသွားများသွားလာရာတွင် အဆင်ပြေလွယ်ကူချောမွေ့စေရေးအတွက် နိုင်လွန်ကတ္တရာများခင်းခြင်း၊ လမ်းမီးတိုင်များဆောင်ရွက်ပေးခြင်း၊ Public Toilet များဆောက်လုပ်ပေးနေခြင်း၊ လုံခြုံရေးအတွက် CCTV ကင်မရာများတပ်ဆင်ပေးနေခြင်းများအပြင် ဒေသတွင်းဟိုတယ်နှင့်ခရီးသွားလုပ်ငန်းများဖွံ့ဖြိုးတိုးတက်ရေး အတွက် အကောင်အထည်ဖော်ရာတွင် ပြည်ထောင်စုအဆင့် ဟိုတယ်နှင့်ခရီးသွားလာရေးဝန်ကြီးဌာန၊ သက်ဆိုင်ရာဝန်ကြီးဌာနများနှင့် တင်ပြပေါင်းစပ်ဆောင်ရွက်လျက်ရှိနေပါကြောင်းပြောကြားခဲ့ပါသည်။
ထို့နောက် GTMH Telecom ကုမ္ပဏီမှ DY-CTO ဖြစ်သူ ဦးမြတ်ကိုကိုစိန်မှ ရှမ်းပြည်နယ် ခရီးသွား လုပ်ငန်းဖွံ့ဖြိုးတိုးတက်ရေးအတွက် Digital နည်းပညာအကူအညီတစ်ခုဖြစ်သော Pilot Project အဖြစ် ဦးစွာအကောင်အထည်ဖော်မည့် ညောင်ရွှေမြို့တွင် Smart Pole များ လာရောက်စိုက်ထူသွားမည်ဖြစ်ပြီး၊ အဆိုပါ Smart Pole များတွင် ခရီးသွားဧည့်သည်များအတွက် လိုအပ်သော သတင်းအချက်အလက်များ၊ လုံခြုံရေးအထောက်အကူပြုသော CCTV ကင်မရာများပါဝင်သည့်အတွက် များစွာအကျိုး ကျေးဇူးရရှိသွား မည်ဖြစ်ကြောင်း ရှင်းလင်းတင်ပြရာ တက်ရောက်လာကြသော ရှမ်းပြည်နယ်ဒေသဆိုင်ရာခရီးသွားလုပ်ငန်း ကော်မတီမှ ဒုတိယဥက္ကဌနှင့် အဖွဲ့ဝင်များမှ သိရှိလိုသည်များမေးမြန်းခဲ့ကြပါသည်။ ဆက်လက်၍ ကော်မတီအတွင်းရေးမှူး၊ ညွှန်ကြားရေးမှူး ဦးထင်အောင်နိုင်မှ ရှမ်းပြည်နယ်အတွင်း ဟိုတယ်တည် ဆောက်ခွင့်၊ လိုင်စင်ထုတ်ပေးခွင့်နှင့် ဟိုတယ်နှင့်ခရီးသွားလုပ်ငန်းဆိုင်ရာကိစ္စရပ်များကို တင်ပြဆွေးနွေးပါ သည်။ ထို့နောက် ဟိုတယ်နှင့်ခရီးသွားညွှန်ကြားမှုဉီးစီးဌာန၊ ဟိုတယ်နှင့်ခရီးသွား လာရေးကြီးကြပ်မှု ဌာနခွဲမှ ညွှန်ကြားရေးမှူး ဉီးမျိုးဝင်းညွှန့်မှ ဟိုတယ်လိုင်စင်၊ ခရီးသွားလုပ်ငန်းလိုင်စင်နှင့် အခြားခရီးသွား လုပ်ငန်းနှင့် ဆက်စပ်သောစည်းမျဉ်းစည်းကမ်းများ၊ လုပ်ထုံးလုပ်နည်းများနှင့် အကောင်အထည်ဖော် ဆောင်ရွက်သင့်သည့် အချက်အလက်များကို အကြံပြုသုံးသပ်တင်ပြပြီး ဟိုတယ်နှင့်ခရီးသွားလာရေး ဝန်ကြီးဌာန၏ ဥပဒေအကြံပေးအရာရှိ ဦးစောနှင်းမှ မြန်မာနိုင်ငံခရီးသွားလာရေးဥပဒေ၊ အမိန့်နှင့် လိုက်နာရမည့်အချက်များကို ရှင်းလင်းတင်ပြပါသည်။ ၎င်းနောက် တက်ရောက်လာကြသော ရှမ်းပြည်နယ် ဒေသဆိုင်ရာခရီးသွားလုပ်ငန်းကော်မတီ ဒုတိယဥက္ကဌနှင့် အဖွဲ့ဝင်များမှ သိရှိလိုသည်များကို မေးမြန်းကြ ရာ ပြည်ထောင်စုဝန်ကြီးနှင့် တာဝန်ရှိသူများမှ ပြန်လည်ဖြေကြားခဲ့ကြပါသည်။

မွန်းလွဲပိုင်းတွင် ဟိုတယ်နှင့်ခရီးသွားလာရေးဝန်ကြီးဌာန၊ ပြည်ထောင်စုဝန်ကြီးသည် ညောင်ရွှေမြို့ အထွေထွေအုပ်ချုပ်ရေးဦးစီးဌာန၌ ကျင်းပပြုလုပ်သောဟိုတယ်လုပ်ငန်းရှင်များ၊ အသင်းအဖွဲ့များနှင့် တွေ့ဆုံပွဲသို့တက်ရောက်ပါသည်။ တွေ့ဆုံပွဲသို့ အင်းသားတိုင်းရင်းသားလူမျိုးရေးရာဝန်ကြီး ဒေါက်တာ ထွန်းလှိုင်၊ ပြည်သူ့လွှတ်တော်ကိုယ်စားလှယ်နှင့် ပြည်နယ် လွှတ်တော်ကိုယ်စားလှယ်များ၊ မြို့နယ်အဆင့် ဌာနဆိုင်ရာတာဝန်ရှိသူများတက်ရောက်ကြပါသည်။

အဆိုပါ တွေ့ဆုံပွဲတွင် ပြည်ထောင်စုဝန်ကြီးက အမှာစကားပြောကြားရာတွင် ယခုရေးဆွဲထားသော မြန်မာနိုင်ငံခရီးသွားလာရေးဥပဒေသည် (Decentralization) ဗဟိုဉီးစီးချုပ်ကိုင်မှုကို ဖြေလျော့ထားပြီး တိုင်းဒေသကြီး၊ ပြည်နယ်အစိုးရများအတွက် လုပ်ပိုင်ခွင့်ပေးထားခြင်းဖြစ်သောကြောင့် ဒေသဆိုင်ရာ ဌာနများနှင့် အဖွဲ့အစည်းများ ပူးပေါင်း၍ ခရီးသွားလုပ်ငန်းများတိုးတက်အောင် စီမံဆောင်ရွက်သွားရန် လိုအပ်ပါကြောင်း၊ ဟိုတယ်နှင့်ခရီးသွားလုပ်ငန်းလိုင်စင်များ ခွင့်ပြုပေးရာတွင် ကြန့်ကြာမှုမရှိစေရန် အတွက်ကိုလည်း ထည့်သွင်းစဉ်းစားထားပါကြောင်း၊ အင်းလေးကန်သည် ပြည်တွင်းပြည်ပခရီးသွား ဧည့်သည်များလာရောက်လည်ပတ်နေသည့် ခရီးသွားဆွဲဆောင်မှုနေရာဖြစ်သည့်အတွက် ရေရှည်တည်တံ့ ဖွံ့ဖြိုးရန်အတွက် မိမိတို့အားလုံးတွင် တာဝန်ရှိပါကြောင်း၊ ယခုအခါတွင် ဟိုတယ်နှင့်ခရီးသွားလာရေး ဝန်ကြီးဌာန၌ ခရီးသွားလုပ်ငန်းမြှင့်တင်ခြင်းကို Online စနစ်သို့ပြောင်းလဲ အကောင်အထည်ဖော် ဆောင်ရွက်လျက်ရှိရာတိုင်းဒေသကြီး၊ ပြည်နယ်များရှိ ဟိုတယ်များတွင်လည်း ဧည့်စာရင်းတိုင်ရာတွင် Online Guest List Management System ကို ကျယ်ကျယ်ပြန့်ပြန့်အသုံးပြုသွားရန်လိုအပ်ပါကြောင်း၊ ဟိုတယ်များနှင့် အလှမ်းကွာဝေးသည့်နေရာဒေသများတွင် လူမှုအခြေပြုခရီးသွားလုပ်ငန်း Community Based Tourism (CBT) ကိုအကောင်အထည်ဖော်သွားရန်လိုအပ်ပြီး PPP လုပ်ဆောင်သွားရန် လိုအပ် ပါကြောင်း၊ ခရီးသွားလုပ်ငန်းရောင်းကုန်သည် ဝန်ဆောင်မှု (Service) ဖြစ်သည့်အတွက် အထူးအလေး ထားဂရုပြုသွားရမည် ဖြစ်ကြောင်းပြောကြားပါသည်။

ထို့နောက် အင်းသားတိုင်းရင်းသားလူမျိုးရေးရာဝန်ကြီး ဒေါက်တာထွန်းလှိုင်က ဌာနဆိုင်ရာများ တစ်ခုတည်းလုပ်ဆောင်ရန်ခက်ခဲသည့်အတွက် ဒေသခံအဖွဲ့အစည်းများနှင့် ပြည်သူလူထုများပူးပေါင်း၍ ခရီးသွားလုပ်ငန်းတိုးတက်ဖွံ့ဖြိုးအောင် ဆောင်ရွက်ရမည်ဖြစ်ပါကြောင်း၊ အင်းလေးဒေသတွင် နိုင်ငံခြား သားခရီးသွားဧည့်သည်များ အန္တရာယ်မဖြစ်စေရေးအတွက် လုံခြုံရေးမှာအရေးကြီး သောအခန်းကဏ္ဍ တစ်ခုဖြစ်သည့်အတွက် အလေးထားလုပ်ဆောင်ရမည်ဖြစ်ပါကြောင်း၊အင်းလေးကန် ရေရှည်တည်တံ့ ခိုင်မြဲရေးမှာ အရေးကြီးပါကြောင်းပြောကြားခဲ့ပါသည်။ ထို့နောက် GTMH Telecom ကုမ္ပဏီမှ DY-CTO ဖြစ်သူ ဦးမြတ်ကိုကိုစိန်မှ ညောင်ရွှေမြို့ ခရီးသွားလုပ်ငန်းဖွံ့ဖြိုးတိုးတက်ရေးအတွက် နည်းပညာ အကူ အညီပေးမည့်အစီအစဉ်များကို ရှင်းလင်းတင်ပြရာ တက်ရောက်လာကြသော လွှတ်တော် ကိုယ်စားလှယ် များ၊ ဌာနဆိုင်ရာတာဝန်ရှိသူများနှင့် လုပ်ငန်းရှင်များ၊ အသင်းအဖွဲ့များကသိရှိလို သည်များကို မေးမြန်း ကြရာ ပြည်ထောင်စုဝန်ကြီးနှင့် တာဝန်ရှိသူများမှ ပြန်လည်ဖြေကြားပြီး အစည်းအဝေးကို ရုပ်သိမ်း ခဲ့ကြောင်း သတင်းရရှိပါသည်။

About the author

Leave a Reply