မြန်မာ-တရုတ်ခရီးသွားမြှင့်တင်ရေး ရင်းနှီးကျွမ်းဝင်မှုဆိုင်ရာခရီးစဉ် (Familiarization Trip- FAM Trip) တွင် လိုက်ပါလာကြသည့်ကိုယ်စားလှယ်များ နေပြည်တော် ဟိုတယ်လုပ်ငန်းဆိုင်ရာ သင်တန်းကျောင်း၌ အမှတ်တရသစ်ပင်များစိုက်ပျိုး

နေပြည်တော် မေ ၁၆ မြန်မာ-တရုတ် ခရီးသွားမြှင့်တင်ရေး ရင်းနှီးကျွမ်းဝင်မှုဆိုင်ရာခရီးစဉ် (Familiarization Trip- FAM Trip) တွင် လိုက်ပါလာကြသည့် ကိုယ်စားလှယ်များသည် ယနေ့နံနက်ပိုင်းတွင် ပြည်ထောင်စု နယ်မြေ နေပြည်တော် ဟိုတယ်လုပ်ငန်းဆိုင်ရာသင်တန်းကျောင်း၌ အမှတ်တရသစ်ပင်များ စိုက်ပျိုး ကြရာ ဟိုတယ်နှင့်ခရီးသွားလာရေးဝန်ကြီးဌာန ပြည်ထောင်စုဝန်ကြီး ဒေါက်တာသက်သက်ခိုင်၊ အမြဲတမ်းအတွင်းဝန်၊ ညွှန်ကြားရေးမှူးချုပ်နှင့် အရာရှိကြီးများ၊ နေပြည်တော်ဟိုတယ်ဆိုင်ရာ လုပ်ငန်းရှင်များအသင်းနှင့် ခရီးသွားလုပ်ငန်းရှင်များအသင်းတို့မှ ဥက္ကဋ္ဌများနှင့် တာဝန်ရှိသူများ၊ ဟိုတယ်များမှ တာဝန်ရှိသူများက သွားရောက်ကြည့်ရှုအားပေးကြသည်။ ကြည့်ရှုအားပေးစဉ် ပြည်ထောင်စုဝန်ကြီးက မြန်မာ-တရုတ် ခရီးသွားမြှင့်တင်ရေး ရင်းနှီး ကျွမ်းဝင်မှုဆိုင်ရာ ခရီးစဉ်တွင်လိုက်ပါလာကြသည့် ကိုယ်စားလှယ်များကို ယခုခရီးစဉ်၏ အမှတ် တရအဖြစ် သစ်ပင်စိုက်ပျိုးခြင်းအစီအစဉ် ထည့်သွင်းပေးထားခြင်းဖြစ်ပါကြောင်း၊ ကိုယ်စားလှယ် များ စိုက်ပျိုးထားခဲ့သောအပင်များကို နောင်လာမည့်နှစ်များတွင် လာရောက်ကြည့်ရှုနိုင်ရေးအတွက် ထပ်မံဖိတ်ခေါ်ပေးသွားမည်ဖြစ်ပါကြောင်း၊ အစိမ်းရောင်ခရီးသွားလုပ်ငန်းမြှင့်တင်ရေး ဆောင်ရွက် ရာတွင် အားပေးကူညီပေးစေလိုသည့်အတွက် ဆောင်ရွက်ပေးခြင်းဖြစ်ပါကြောင်း၊ ဆက်လက် သွားရောက်မည့် ခရီးစဉ်များတွင် ပျော်ရွှင်ပါစေကြောင်း ဆုမွန်တောင်းစကား ပြောကြားသည်။ ထို့နောက် (FAM Trip) ၏ ကိုယ်စားပြုသူ ကိုယ်စားလှယ်တစ်ဦးက သစ်ပင်စိုက်ပျိုး စောင့်ရှောက်မှုအတွက် နေပြည်တော် ဟိုတယ်ဆိုင်ရာလုပ်ငန်းရှင်များအသင်းဥက္ကဋ္ဌထံသို့ အလှူငွေ ပေးအပ်ပြီး စုပေါင်းမှတ်တမ်းတင် ဓာတ်ပုံရိုက်ကြသည်။ ဆက်လက်၍ ပြည်ထောင်စုဝန်ကြီးသည် ဂျပန်နိုင်ငံ Sendai မြို့အခြေစိုက် Grape City ကုမ္ပဏီလီမိတက်မှ ကိုယ်စားလှယ်အဖွဲ့ကို ဝန်ကြီးဌာန၏ နီလာခန်းမ၌ လက်ခံတွေ့ဆုံသည်။ တွေ့ဆုံစဉ် ခေတ်စနစ်နှင့်လျော်ညီသော ခရီးသွားမြှင့်တင်ရေးဆိုင်ရာဗီဒီယိုများ ရိုက်ကူး တည်းဖြတ်ရေးဆိုင်ရာကိစ္စ၊ website နှင့် social media များတွင် မြန်မာနိုင်ငံ၏ ပုံရိပ် ကောင်းမွန်သော ခရီးသွားအချက်အလက်များ ကျယ်ကျယ်ပြန့်ပြန့် လွှင့်တင်ဖြန့်ဝေရေးဆိုင်ရာကိစ္စ၊ နည်းပညာနှင့် လူ့စွမ်းအားအရင်းအမြစ် ဖွံ့ဖြိုးတိုးတက်ရေးအတွက် ပူးပေါင်းဆောင်ရွက်ရေးဆိုင်ရာ ကိစ္စ၊ ခရီးစဉ်ဒေသများအလိုက် တိုင်းရင်းသားရိုးရာယဉ်ကျေးမှုများနှင့် အစားအစာများ မြှင့်တင် ကြော်ငြာရေးဆိုင်ရာကိစ္စ၊ နိုင်ငံတကာအစည်းအဝေးများတွင် မြန်မာနိုင်ငံကို ဆွဲဆောင်မှုရှိပြီး လည်ပတ်စရာကောင်းသော ခရီးစဉ်ဒေသတစ်ခုအဖြစ် မြှင့်တင်နိုင်ရေးဆိုင်ရာကိစ္စရပ်များကို ဆွေးနွေးခဲ့ကြောင်း သိရသည်။   သတင်းစဉ် Source From: Myanmar Alin