ဒုတိယဝန်ကြီးနှင့်အဖွဲ့သည် (၈.၁၂.၂၀၁၉) ရက်နေ့၊ နံနက်ပိုင်းတွင် ကျိုက်ထိုမြို့နယ်၊ တောင်ကလေးကျေးရွာရှိ ဝါးဖြင့်ပြုလုပ်သည့် လက်မှုပစ္စည်းထုတ်ကုန်များ ထုတ်လုပ်ရန်အတွက် အထောက်အကူပြုအဆောက်အဦနှင့် မမှိုချောင်ကျေးရွာရှိ သစ်သီးခြောက်နှင့် သစ်သီးယိုထုတ်လုပ် ရန်အတွက် အထောက်အကူပြုအဆောက်အဦတို့အား လည်းကောင်း၊ ချောင်းဆုံမြို့နယ် ၊ ကုလားဘီ ကျေးရွာရှိ ဝါးဖြင့်ပြုလုပ်သည့် လက်မှုပစ္စည်းထုတ်ကုန်များ ထုတ်လုပ်ရန်အတွက် အထောက်အကူပြု အဆောက်အဦအား လည်းကောင်း၊ မော်လမြိုင်မြို့ ဖက်တန်းရပ်ကွက်ရှိ သတင်းနှင့်ပြန်ကြားရေး ကောင်တာ ဖွင့်လှစ်ထားသည့် အဆောက်အဦအား စီမံကိန်းမှ ထွက်ရှိသည့် ထုတ်ကုန် များ ခင်းကျင်း ပြသရောင်းချနိုင်ရန်အတွက် ဘက်စုံသုံးအဆောက်အဦအဖြစ် ပြောင်းလဲဆောက်လုပ်မည့်အခြေ အနေတို့အားလည်းကောင်း သွားရောက်ကြည့်ရှုစစ်ဆေးခဲ့ကြပါသည်။
ထို့နောက် မွန်းလွဲပိုင်းတွင် ဒုတိယဝန်ကြီးနှင့်အဖွဲ့သည် မွန်ပြည်နယ်ရှိ ဟိုတယ်/တည်းခို ရိပ်သာလုပ်ငန်းရှင်များ ၊ ခရီးလှည့်လည်ရေး လုပ်ငန်းရှင်များ၊ ဧည့်လမ်းညွှန်များ ၊ ဒေသဆိုင်ရာ ဧည့်လမ်းညွှန်များ ၊ စားသောက်ဆိုင် လုပ်ငန်းရှင်များကို ငွေမိုးဟိုတယ်၌ တွေ့ဆုံ၍ ဟိုတယ်နှင့် ခရီးသွားလာရေးကဏ္ဍဖွံ့ဖြိုးတိုးတက်ရေးဆိုင်ရာများကို ဆွေးနွေးခဲ့ကြပါသည်။
ညနေပိုင်းတွင် ဒုတိယဝန်ကြီးနှင့်အဖွဲ့သည် မုဒုံမြို့နယ် သိမ်ကုန်းကျေးရွာတွင် ဆောက်လုပ် လျက်ရှိသည့် ယက္ကန်းယက်လုပ်ရန်နှင့် သဘာဝဆိုးဆေးထုတ်လုပ်ရန်အတွက် အထောက်အကူပြု အဆောက်အဦ တည်ဆောက် နေမှုအခြေအနေများအား သွားရောက်ကြည့်ရှုစစ်ဆေးခဲ့ကြပါကြောင်း သတင်းရရှိပါသည်။