COMMUNITY VISIT
IN YANGON REGION

 CBT Site အကြောင်း

ကျေးရွာ/ရပ်ကွက်လူမှုအဖွဲ့အစည်းအခြေပြုခရီးသွားလုပ်ငန်း( Community Based Tourism )ဆိုသည်မှာ မိမိ ကျေးရွာ/ရပ်ကွက်သို့လာရောက်ကြည့်ရှုလေ့လာလည်ပတ်မည့်ခရီးသည်များကို ကျေးရွာ/ရပ်ကွက်၏လူမှုရေးအဖွဲ့အစည်းများမှဧည့်ခံကျွေးမွေးခြင်း၊နေရာထိုင်ခင်းစီစဉ်ပေးခြင်း၊ကျေးရွာယဉ်ကျေးမှုနှင့်ဓလေ့ထုံးတမ်းကိုဖော်ထုတ်ပြသခြင်း၊ကျေးရွာ/ရပ်ကွက်ကောင်းကျိုးများ၊ပတ်ဝန်းကျင်သဘာဝကိုထိန်းသိမ်းခြင်းပြုလုပ်မည်ဆိုပါကဝိုင်းဝန်းကူညီပံ့ပိုးပေးခြင်း၊မိမိဒေသထွက်လက်မှုပစ္စည်းများထုတ်လုပ်ပြသရောင်းချခြင်းနှင့်ကျေးရွာ/ရပ်ကွက်အနီးတဝိုက်တွင်ရှိသောရှေးဟောင်းဘုရားစေတီနှင့်ခရီးသည်များစိတ်ဝင်စားသည့်နေရာများကိုလှည့်လည်ပြသခြင်းစသည့်လုပ်ငန်းများကိုပြည်တွင်းခရီးလှည့်လည်ရေးလုပ်ငန်းများ (Tour Operator)နှင့်အခြားအဖွဲ့အစည်းများဖြင့်ဆက်သွယ်ဆောင်ရွက်ပြီးကျေးရွာ/ရပ်ကွက်အတွက်ဝင်ငွေနှင့်ကျေးရွာအဖွဲ့အစည်းများရေရှည်တည်တံ့သော( Sustainable ) သုခချမ်းသာ ( Well-being )ရရှိနိုင်သောခရီးသွားလုပ်ငန်းတစ်ခုဖြစ်ပါသည်။ကျိုက်သလဲကျေးရွာ CBT သည်လည်းကျေးရွာနေပြည်သူလူထု၏အလုပ်အကိုင်အခွင့်အလမ်းရရှိစေရန်နှင့်လူနေမှုဘဝဖွံ့ဖြိုးတိုးတက်စေရန်ရည်ရွယ်၍ဖွင့်လှစ်ထားခြင်းဖြစ်ပါသည်။

ကျိုက်သလဲကျေးရွာ(အလယ်ပိုင်း)သည် ရန်ကုန်တိုင်းဒေသကြီး၊တွံတေးမြို့နယ်၊ ကျိုက်သလဲကျေးရွာအုပ်စုတွင် တည်ရှိပြီးရန်ကုန်မြို့နှင့်(၂၈)မိုင်ခန့်အကွာတွင်တည်ရှိပါသည်။ယခင်နာဂစ်အလွန်မှစ၍ကျေးရွာအကျိုးပြုလုပ်ငန်း (Community Project ) ပြုလုပ်သည့် ကျေးရွာဖြစ်ပြီး ယခုအခါ လူထုအခြေပြုခရီးသွားလုပ်ငန်း ဖော်ဆောင်ထားရှိပါသည်။

ပြည်တွင်း/ပြည်ပခရီးသွားဧည့်သည်များလာရောက်လည်ပတ်နေကြပြီးကျေးရွာအတွင်းဝါးခြင်းငယ်များယက်လုပ်ခြင်း၊အိမ်တွင်းအပ်ချုပ်လုပ်ငန်းနှင့်တပိုင်တနိုင်စိုက်ပျိုးမွေးမြူရေးလုပ်ငန်း( Mingalar Bio Garden စိုက်ပျိုးရေးဥယျာဉ်တည်ရှိခြင်း)တို့ကိုတွေ့မြင်လေ့လာလည်ပတ်နိုင်ပါသည်။ကျိုက်သလဲကျေးရွာCBTသည်လည်းကျေးရွာနေပြည်သူလူထု၏အလုပ်အကိုင်အခွင့်အလမ်းရရှိစေရန်နှင့်လူနေမှုဘဝဖွံ့ဖြိုးတိုးတက်စေရန်ရည်ရွယ်၍ဖွင့်လှစ်ထားခြင်းဖြစ်ပါသည်။

CBT Site တွင်လုပ်ဆောင်နိုင်သော activity များ

• ကျေးရွာသူ/သား တွေရဲ့ ဧည့်ခံကြိုဆိုခြင်းနဲ့အတူ တရင်းတနှီး စကားပြောခွင့်ရမယ်
• ဥယျာဉ်အတွင်း သီးပင်စားပင်/အရိပ်ရပင်တွေကို ကိုယ်တိုင်စိုက်ခွင့်ရမယ်
• နေ့စဉ်လူမှုဘဝနဲ့ ကျေးရွာတွင်း လုပ်ငန်းတွေကို လေ့လာခွင့်ရမယ် (ပဲပင်ပေါက်ဖောက်ခြင်း/စက်ချုပ်လုပ်ငန်း/မွေးမြူရေးလုပ်ငန်း/ငွေပန်းတိမ်လုပ်ငန်း အစရှိသဖြင့်)
• ရွာထဲမှာ စက်ဘီးစီးမယ်။ ရာဘာတောထဲ လမ်းလျှောက်သွားပြီး ဓာတ်ပုံလှလှလေးတွေ ရိုက်မယ်။
• ဥယျာဉ်ထဲက လတ်ဆတ်တဲ့ သီးနှံတွေ ခူးယူပြီး ချက်ပြုတ်တာတွေကူညီရင်းနဲ့ သင်ယူခွင့်ပါ ရရှိမယ်။

ကျိုက်သလဲကျေးရွာတည်ရှိသော တွံတေးမြို့နယ်သည် စက်ဘီးစီးခြင်း(Cycling)နှင့် ပတ်ဝန်းကျင်သစ်တွင် လမ်းလျှောက်ခြင်း(soft trekking)တို့ ပြုလုပ်ရန်အတွက် အဆင်ပြေကောင်းမွန်သော ‌‌ဒေသတစ်ခုဖြစ်သည်။ သီးသန့်ခရီးသွားချင်သူများ၊ အတွေ့အကြုံသစ်ရှာချင်သူများ၊ မိသားစုခရီးစဉ်များအတွက် အလွန်သင့်တော်သည်။ မွန်ဘုရင်တည်ထားခဲ့သော နှစ်၁၀၀၀ သက်တမ်းရှိ ရွှေစံတော်ဘုရားလဲ တည်ရှိသည်။ တွံတေးအိုးလုပ်ငန်းနှင့် စျေးအတွင်း ဝင်ရောက်လေ့လာလည်ပတ်ပြီးရင်တော့ ပြည့်စုံတဲ့အတွေ့အကြုံသစ်တွေ ရရှိပြီလို့ ယူဆလို့ရပါပြီ။

 ကျိုက်သလဲကျေးရွာသို့ လာရောက်လည်ပတ်သူများအတွက် နေ့ချင်းပြန်ခရီးစဉ်၊ တစ်ညအိပ်၊ နှစ်ညအိပ်ခရီးစဉ် များကို အဆင်ပြေအောင်ဆောင်ရွက်ပေးလျှက်ရှိပါတယ်။

CBT Site အနီးတဝိုက်ရှိ လည်ပတ်စရာနေရာများ

CBT ရွာအပြင်ဘက် အနီးတဝိုက်ရှိ မောင်းတီးစေတီ၊ ရှေးဟောင်းဟိန္ဒူဘုရားကျောင်း၊ ဘုရားကြီးမင်္ဂလာတိုက်ကျောင်းပရဟိတဂေဟာ(မင်္ဂလာဘုန်းတော်ကြီးကျောင်း)သို့သွားရောက်လေ့လာလှူဒါန်းနိုင်ခြင်းနှင့် ၁၅ ရာစု ကတည်းကရှိခဲ့သော ရှေးဟောင်းစဉ့်ဖိုကြီးသို့ သွားရောက်လေ့လာလည်ပတ်ခြင်းများ ပြုလုပ်နိုင်ပါသည်။

တွံတေးအိုးလုပ်ငန်း၊ဘောင်းတော်ချုပ်ဘုရား၊ ရွှေစံတော်ဘုရားစသဖြင့်တွံတေးမြို့ရှိSightseeingနေရာများသို့ သွားရောက် လည်ပတ်နိုင်ပါသည်။

CBT Site သို့ သွားရောက်လည်ပတ်နိုင်သည့်လမ်းကြောင်းများ

လမ်းကြောင်း(၁)

            ပန်းဆိုးတန်းဆိပ်ကမ်းမှ သင်္ဘောစီး၍ ဒလဆိပ်ကမ်းသို့ ကူးပြီး ကားဖြင့် ကျိုက်သလဲကျေးရွာသို့ ၄၅မိနစ်ခန့် ကြာလျှင်ရောက်ရှိပါသည်။

လမ်းကြောင်း(၂)

            လှိုင်သာယာ ဘီအိုစီမှ ကားဖြင့် ကျိုက်သလဲကျေးရွာသို့ ၄၅မိနစ်ခန့် ကြာလျှင်ရောက်ရှိပါသည်။

CBT Site သို့ သွားရောက်လည်ပတ်ရန် သင့်လျှော်သည့်အချိန်

ကျိုက်သလဲ‌CBT သည် ရန်ကုန်-ကော့မှူးလမ်းမကြီးဘေးရှိ ကျိုက်သလဲကျေးရွာတွင် တည်ရှိသောကြောင့် ရာသီမရွေး တစ်နှစ်ပတ်လုံး လာရောက်လေ့လာ လည်ပတ်နိုင်ပါသည်။