အချက်အလက်
မြန်မာနိုင်ငံသို့ လှမ်းလာခဲ့ပါ
စိတ်ဝင်စားဖွယ်ရာများ
၀န်ဆောင်မှုများ
လမ်းညွှန်ချက်နှင့်အရင်း အမြစ်များ
သတင်းနှင့်ကြေငြာချက်များ
လုပ်ငန်းတာဝန်

COMMUNITY VISIT
IN KAYAH STATE

Overview

ကယားပြည်နယ်ရှိ CBT Site များအကြောင်း

ကယားပြည်နယ်တွင် လူထုအခြေပြုခရီးသွားလုပ်ငန်းကို International Trade center (ITC) မှ NTF (III) စီမံကိန်းဖြင့် ၂၀၁၄ ခုနှစ်၊ သြဂုတ်လမှစတင် အကောင်ထည်ဖော်ဆောင်ရွက်ခဲ့ပြီး ၂၀၁၇ ခုနှစ်၊ ဇွန်လထိ လူထုအခြေပြုခရီးသွားလုပ်ငန်းဆိုင်ရာ အသိပညာပေးခြင်း၊ သင်တန်းပို့ချခြင်းများ ပြုလုပ်ခဲ့ ပါသည်။ ထို့နောက် NTF (IV) စီမံကိန်းကို ၂၀၁၇ ခုနှစ်၊ ဒီဇင်ဘာလမှစတင်၍ ၂၀၂၁ ခုနှစ်၊ ဇွန်လထိ လူထုအခြေပြုခရီးသွားလုပ်ငန်းများဖွံ့ဖြိုးတိုးတက်စေရန် ဆောင်ရွက်ပေးလျက်ရှိပါသည်။ လက်ရှိတွင် ဒီးမော့ဆိုမြို့နယ်ရှိ ပန်ပက်ကျေးရွာနှင့် တနီးလာလဲကျေးရွာများတွင် လူထုအခြေပြု ခရီးသွားလုပ်ငန်း များ အောင်မြင်လျက်ရှိပါသည်။ ဖရူဆိုမြို့နယ်ရှိ ထေခိုကျေးရွာနှင့် ဒီးမော့ဆိုမြို့နယ်ရှိ ဒေါတမကြီး ကျေးရွာများအား လူထုအခြေပြုခရီးသွားလုပ်ငန်းများ ဆက်လက်အကောင်အထည် ဖော်ဆောင်ရွက် လျှက်ရှိပါသည်။ ယခုအခါတွင် အောင်မြင်နေသော လူထုအခြေပြုခရီးသွားလုပ်ငန်း (CBT) ကျေးရွာများ ဖြစ်သည့် ပန်ပက်ကျေးရွာနှင့် တနီးလာလဲကျေးရွာများမှ ဝင်ငွေများရရှိပြီး ကျေးရွာအတွက် အထောက် အကူ ပြုလျက်ရှိပါသည်။

ကျေးရွာတစ်ရွာစီတိုင်းတွင် ခရီးသွားဧည့်သည်များအား ဝန်ဆောင်မှုပေးရန်အတွက် ဥက္ကဌ ၊ ညှိနှိုင်းရေးမှူး၊ ဘဏ္ဍာရေးမှူး၊ အတွင်းရေးမှူး၊ ဒေသခံဂိုက်အဖွဲ့၊ အချက်အပြုတ်အဖွဲ့၊ တေးဂီတ အဖွဲ့များ ဟူ၍ အသီးသီးဖွဲ့စည်းထားပါသည်။ ဝန်ဆောင်မှုတစ်ခုစီတိုင်း၏ အဖွဲ့ဝင်တစ်ဦး စီတိုင်းကို အလှည့်ကျ စနစ်ဖြင့် ဝန်ဆောင်မှုပေးစေခြင်းများ၊ ဧည့်သည်များကျေးရွာများသို့ မလာခင် ကြိုတင် ဘိုကင်လုပ်စေခြင်းများ ပြုလုပ်ထားပါသည်။ လူထုအခြေပြုခရီးသွားလုပ်ငန်းမှ ရရှိသော ဝင်ငွေများကို လည်း စာရင်းဇယားများဖြင့် တိကျစွာပြုလုပ်ထားပြီး ရရှိလာသော ဝင်ငွေများထဲမှ ၁၀ရာခိုင်နှုန်းကို ကျေးရွာရန်ပုံငွေအဖြစ်ပြန်လည်ထည့်ဝင်စေပြီး အဆိုပါကျေးရွာရန်ပုံငွေများကို ဘဏ်တွင် ထည့်သွင်း၍ သိမ်းဆည်းထားပြီး ကျေးရွာဖွံ့ဖြိုးတိုးတက်ရေးအတွက် လိုအပ်သည့်အခါ အသုံးပြုနိုင်ရန်အတွက် စီမံ ဆောင်ရွက်ထားပါသည်။

ပန်ပက်ကျေးရွာ

ပန်ပက်ကျေးရွာသည် လွိုင်ကော်ခရိုင်၊ ဒီးမော့ဆိုမြို့နယ် အတွင်းတည်ရှိပါသည်။ အိမ်ခြေ (၇၉)အိမ်ရှိပြီး အိမ်ထောင်စု (၇၉) နှင့် စုစုပေါင်း လူဦးရေ (၅၁၆) ဦးရှိပါသည်။

ပန်ပက်ကျေးရွာသည် ကယန်း(ပဒေါင်)လူမျိုးများ အဓိကနေထိုင်ရာ ရွာဖြစ်ပါသည်။ နိုင်ငံ ခြားသား ခရီးသွားဧည့်သည်များအနေဖြင့် ကယန်း(ပဒေါင်) လူမျိုးတို့၏ ကြေးကွင်းစွပ် ဓလေ့ထုံးစံ နှင့် ရိုးရာဝတ်စားဆင်ယင်မှု၊ တံခွန်တိုင်၊ နတ်ကိုးကွယ်မှု၊ ခေါင်ရည်ချက်လုပ်မှုစသည့် ယဉ်ကျေးမှု များကို စိတ်ဝင်စားမှုရှိပါသည်။

ပန်ပက်ကျေးရွာသည် တောင်ယာလုပ်ငန်းကိုအဓိကလုပ်ကိုင်ကြပါသည်။ တစ်နိုင်တစ်ပိုင် ရက္ကန်းလုပ်ငန်းများကိုလည်း လုပ်ကိုင်ကြပါသည်။ ခရီးသွားဧည့်သည်များ တိုးတက်များပြားလာသည် နှင့်အမျှ မိမိတို့ကျေးရွာအမှတ်တံဆိပ် ရက္ကန်းထည်များထုတ်လုပ်ရောင်းချနိုင်ရန် သက်ဆိုင်ရာ အဖွဲ့ အစည်းများနှင့် ညှိနှိုင်းဆောင်ရွက်လျှက်ရှိပါသည်။ အခြားအသေးစားစီးပွားရေးလုပ်ငန်းများဖြစ်သည့် ဝါးဖြင့် အခြေခံလူသုံးကုန်ပစ္စည်းများ အရည်အသွေးမှီထုတ်လုပ်နိုင်ရေးအတွက် ညှိနှိုင်းဆောင်ရွက် လျက်ရှိပါသည်။

လွိုင်ကော်-ဒီးမော့ဆိုစျေး-ပန်ပက် ခရီးစဉ်ဒေသအဖြစ် နေ့ချင်းပြန်ခရီးပို့ဆောင်လျှက်ရှိပါသည်။ ပန်ပက်ကျေးရွာအတွင်း Trekking လျှောက်ခြင်းအား နေ့ဝက်ခရီးဆောင်ရွက်ထားပါသည်။ ခရီးစဉ်တွင် ကျေးရွာစိုက်ခင်းများနှင့် သဘာဝတောတောင်အလှအပများကို ခံစားနိုင်ပါသည်။

တနီးလာလဲကျေးရွာ

တနီးလာလဲကျေးရွာသည် လွိုင်ကော်ခရိုင် ဒီးမော့ဆိုမြို့နယ် ဒေါကလော်ဒူ ကျေးရွာအုပ်စု တွင်တည်ရှိပါသည်။ ကျေးရွာတွင် အိမ်ခြေ (၁၇၉)အိမ်ရှိပြီး အိမ်ထောင်စု(၁၈၂) စုရှိပါသည်။လူဦးရေ စုစု ပေါင်း (၉၃၆) ဦးရှိပါသည်။

တနီးလာလဲကျေးရွာတွင် ကယားလူမျိုးအများစု နေထိုင်ကြပါသည်။ ရိုးရာဝတ်စုံများကို လည်း ဝတ်ဆင်ကြပါသည်။ နတ်ကိုးကွယ်မှု ဓလေ့ထုံးစံများ တံခွန်တိုင်ပွဲတော်များကိုလည်း နှစ်စဉ် ကျင်းပ လျက်ရှိပါသည်။

တောင်ယာလုပ်ငန်းကိုအဓိကလုပ်ကိုင်ကြပြီး စပါး၊ပြောင်းကောက်နှင့် ပြောင်းကို အဓိကစိုက် ပျိုးကြပါသည်။ ဝါးဖြင့်အခြေခံပြုလုပ်သည့် ပလိုင်းများ၊တောင်းများကို တစ်နိုင်တစ်ပိုင်ထုတ်လုပ်ရာ မှ ခရီးသွားဧည့်သည်များကို ရောင်းချနိုင်ရန်အတွက် ဆောင်ရွက်လျက်ရှိပါသည်။ ရက္ကန်းလုပ်ငန်း များကိုလည်းအားပေးကူညီဆောင်ရွက်လျက်ရှိပါသည်။

ထေခိုကျေးရွာ

ထေခိုကျေးရွာသည် ဖရူဆိုမြို့နယ်အတွင်းတွင် တည်ရှိပါသည်။ ကျေးရွာတွင် ကယောတိုင်း ရင်းသားအများဆုံးနေထိုင်ပြီး အိမ်ခြေ(၇၈)အိမ်ရှိပြီး အိမ်ထောင်စု(၇၅)စု ရှိပါသည်။ကျေးရွာအတွင်း လူဦးရေ (၃၅၈)ဦးနေထိုင်ကြပြီး ခရစ်ယာန်ဘာသာကို ကိုးကွယ်သူများဖြစ်ကြပါသည်။ ကျေးရွာ အတွင်းတွင် ဘုရားကျောင်း၊စာသင်ကျောင်း(မူလတန်း)၊ကျေးလက်ကျန်းမာရေးဌာနခွဲနှင့် ယဉ်ကျေး မှုပြခန်းများရှိပါသည်။

တောင်ယာစိုက်ပျိုးရေးလုပ်ငန်းနှင့် မွေးမြူရေးလုပ်ငန်းများလည်း လုပ်ကိုင်ကြကာ အသက် မွေးဝမ်းကြောင်း ပြုကြပါသည်။ ကျေးရွာ အတွင်းတွင် ရွာ၏သမိုင်းကြောင်းကို ပြောပြနိုင်သူနှင့် ရိုးရာတူရိယာများကို ကောင်းစွာတီးမှုတ်တတ်သူများကိုလည်း ယနေ့တိုင်တွေ့ရှိရပါသေးသည်။ ဝါးနှီး စသည်ဖြင့် ပြုလုပ်ထားသော အိုး၊ခွက်များကိုလည်း အသုံးပြုနေကြသေးသည်။ ဝါးဂီတာများ တီးမှုတ်ကာ ရိုးရာသီချင်းများနှင့် ညနေပိုင်းအချိန်တွင် မိသားစုတွေ့ဆုံပွဲများရှိနေသည်မှာလည်း ကျေးရွာ၏ ရိုးရာ ဓလေ့များကို ရိုးသားစွာဖော်ပြနေပါသည်။

နိုင်ငံခြားခရီးသွား ဧည့်သည်များ အနေဖြင့်ကယောလူမျိုး တို့၏ ကြေးကွင်းစွပ်ဓလေ့ထုံးစံနှင့် ရိုးရာဝတ်စားဆင်ယဉ်မှု၊ နတ်ကိုးကွယ်မှု၊ ခေါင်ရည်ချက်လုပ်မှု စသည့်ယဉ်ကျေးမှုများကို စိတ်ဝင်စား မှုရှိပါသည်။ ယင်းတို့ တည်ဆောင်ထားသည့် အိမ်များသည် တောင်စောင်းတောင်ပေါ်တွင် တည်ရှိ ပါသည်။ ရွာသူ/ ရွာသားတို့၏ ဖော်ရွေစွာဆက်ဆံတတ်မှု၊ ဧည့်ဝတ်ကျေမှုတို့မှာ အံ့သြဖွယ်ကောင်းလှပါ သည်။

ဒေါတမကြီးကျေးရွာ

ဒေါတမကြီးကျေးရွာသည် ဒီးမော့ဆိုမြို့၏(၂၇)မိုင် အကွာတွင် တည်ရှိပါသည်။ကယားလူမျိုး များနေထိုင်ရာ ရွာကြီးဖြစ်ပါသည်။ ဒေါတမကြီးကျေးရွာစတင်ဖြစ်ပေါ်လာပုံမှာ ဒေါခူလီကျေးရွာ၊ ဒေါအီလကျေးရွာ၊ ဒေါတမကြီးကျေးရွာ(၃)ရွာ စုပေါင်းနေထိုင်ပြီး ဒေါတမကြီးကျေးရွာဟု အမည် ပေးထားခြင်းဖြစ်ပါသည်။ ကျေးရွာတွင် အိမ်ခြေ (၃၉၉)အိမ်ရှိပြီး အိမ်ထောင်စု(၃၉၉) စုရှိပါသည်။ လူဦးရေ စုစုပေါင်း (၁၉၅၆) ဦးရှိပါသည်။ ကျေးရွာအတွင်း နေထိုင်လျက်ရှိသော သက်ကြီးကယား လူမျိုးများသည် ရိုးရာဝတ်စုံများ ကို ဝတ်ဆင်လျက်ရှိပါသည်။

ကျေးရွာရှိ စပါးများအားကျေးရွာအပြင်ဘက်တွင် သီးသန့်အိမ်များတည်ဆောက်၍ သိုလှောင် သိမ်း ဆည်းထားသည့် ဓလေ့များသည် ထူးခြားမှုရှိပြီး ခရီးသွားဧည့်သည်များကို ဆွဲဆောင်ထားနိုင်ပါသည်။ ကျေးရွာရှိ နတ်ဆရာသည် ကျေးရွာလူထုကိုးကွယ်ယုံကြည်မှု နှင့် ရွာ၏သမိုင်းကြောင်းများကို အကောင်းမွန်ဆုံး ရှင်းလင်းပြောကြားပေးနိုင်သူဖြစ်ပါသည်။ ခရီးသွားဧည့်သည်များ သွားရောက်သင့် သည့် နေရာတစ်ခုဖြစ်ပါသည်။ ကျေးရွာသူ ကျေးရွာသားများသည် တောင်ယာလုပ်ငန်းကို အဓိက လုပ်ကိုင်ကြပြီး ယခုအချိန်အထိ ရိုးရာရက္ကန်းများကို ယက်လုပ်လျက်ရှိပါသည်။ ကျေးရွာရှိ လူငယ် လူရွယ်များသည် ခရီးသွားလုပ်ငန်းအပေါ်စိတ်ဝင်စားမှုရှိကြပါသည်။

Activites

CBT Site အနီးတဝိုက်ရှိ လည်ပတ်စရာနေရာများ

ပန်ပက်ကျေးရွာ

ခရီးသွားဧည့်သည်များကျေးရွာသို့ရောက်ရှိပါက ဦးစွာ Community Center တွင် CBT Guide မှ ကြိုဆို၍ ကျေးရွာတွင် ဆောင်ရွက်မည့်အစီစဉ်များအား ရှင်းလင်းပြောကြားပါသည်။ ထို့နောက် CBT Guide မှ ဦးဆောင်ကာ ပထမဦးဆုံး ကျေးရွာတံခွန်တိုင်သို့ သွားရောက်လည်ပတ်ပြီး တံခွန်တိုင် ပွဲပြုလုပ်ပုံ၊ ကျင်းပပုံများကို လေ့လာကြပါသည်။ ငှက်လိုက်ပွဲပြုလုပ်သောနေရာသို့ သွားရောက်လေ့လာ လည်ပတ်ပါသည်။ ငှက်လိုက်ပွဲပြုလုပ်ခြင်းသည်လည်း အလွန်စိတ်ဝင်စားဖွယ် ကောင်းလှပါသည်။ ပန်ပက်ကျေးရွာရှိ တောင်ပေါ်သို့ Trekking (Nature Trail) လျှောက်ခြင်း ပြုလုပ်ပါသည်။ Trekking လျှောက်ခြင်းသည် ခရီးသွားဧည့်သည်များအတွက် အလွန်စိတ်ဝင်စားဖို့ကောင်းသော activity တစ်ခု ဖြစ်ပါသည်။ Trekking လမ်းကြောင်းတစ်လျှောက်တွင် ပန်ပက် ကျေးရွာ၏ တောတောင်ရေမြေ သဘာဝ ပတ်ဝန်းကျင်လှပမှုများစွာ ခံစားကြည့်ရှုနိုင်ပြီး ကျေးငှက်သာရကာများ၏ တေးသံများစွာကိုပါ ခံစားတွေ့ မြင်ရပါသည်။ တောင်ဆင်းတောင်တက် လမ်းကြောင်း မတူညီသောကြောင့် ခံစားမြင်တွေ့ရသော မြင်ကွင်းရသမှာလည်း ကွဲပြားပါသည်။ တောင်ပေါ်တွင် စားသောက်ရန်အတွက် Jungle Lunch လည်း မှာယူစားသောက်လို့ရပါသည်။

တောင်တက်ခြင်းမှပြန်ရောက်လျှင် Community Center တွင် ခေတ္တအမောဖြေကာ ဂျပ်ခုတ်(ရက်ကန်း) အဖွားအိမ်သို့ သွားရောက်လေ့လာလည်ပတ်ပါသည်။ ဂျပ်ခုတ်အဖွားအိမ်တွင် ဂျပ်ခုတ်ခြင်းကို စိတ်ဝင်စားဖွယ်လေ့လာပြီး ကိုယ်တိုင်ဝင်ရောက်လုပ်ကိုင်ခြင်းများလည်း ပြုလုပ် နိုင်ပါသည်။ ဂျပ်ခုတ်အိမ်ပြီးလျှင် ရိုးရာလက်မှုလုပ်ငန်း နှင့် လက်ဝတ်ရတနာများ ပြုလုပ်သော အိမ်သို့ သွားရောက်လည်ပတ်ပါသည်။ ရိုးရာလက်မှုလုပ်ငန်းနှင့် လက်ဝတ်ရတနာလုပ်သော အိမ်တွင် လက်ဝတ် ရတနာများပြုလုပ်ပုံအဆင့်ဆင့်ကို ကိုယ်တိုင်ပါဝင်လေ့လာပြုလုပ်ခြင်းများပြုလုပ်ပါသည်။ အချက် အပြုတ် အိမ်တွင် ကယန်းရိုးရာအစားအသောက်များကို နေ့လည်စာအတွက် ကြိုတင်မှာယူစားသုံး နိုင်ပါသည်။ နေ့လည်စာစားသုံးပြီးချိန်တွင် ကယန်းအတီးအမှုတ် ပညာရှင်နှင့်တွေ့ဆုံပြီး သာယာငြိမ့် ညောင်းသော ကယန်းရိုးရာတူရိယာများစွာဖြင့် မတူညီသော တေးသံများစွာကို နားဆင်နိုင်ပါသည်။ ချစ်စရာကောင်းသော ကယန်းကြေးပတ် အမျိုးသမီးများ ရောင်းချသော လက်မှုပစ္စည်းဆိုင်များသို့ သွားရောက်လည်ပတ်ပြီး ကယန်းရိုးရာဝတ်စုံများ၊ အမှတ်တရပစ္စည်း များစွာကို ဝယ်ယူကြပါသည်။

တနီးလာလဲကျေးရွာ

ခရီးသွားဧည့်သည်များကျေးရွာသို့ရောက်ရှိပါက ဦးစွာ Community Center တွင် CBT Guide မှ ကြိုဆိုပြီး ကျေးရွာတွင် ဆောင်ရွက်မည့်အစီစဉ်များအား ရှင်းလင်းပြောကြားပါသည်။ ထို့နောက် CBT Guide မှ ဦးဆောင်ကာ ပထမဦးဆုံး ကျေးရွာတံခွန်တိုင်သို့ သွားရောက်လည်ပတ်ပြီး တံခွန်တိုင်ပွဲ ဘာကြောင့်ပြုလုပ်ရတာလဲ၊ ဘယ်လိုပြုလုပ်ကြတယ်၊ ဘယ်ချိန်ပြုလုပ်တယ်၊ ဘယ်လို ပြင်ဆင်ကြတယ်၊ ဆောင်ရန်ရှောင်ရန်တွေကဘယ်လိုဆိုတဲ့ ကျေးရွာတံခွန်တိုင်ပွဲ ဖြစ်ပေါ်လာပုံနှင့် ပြုလုပ်ပုံအဆင့်ဆင့်ကို CBT Guide မှ သေသေချာချာရှင်းပြပေးပါသည်။ ကျေးရွာတံခွန်တိုင် လည်ပြီးလျှင် ငှက်လိုက်ပွဲပြုလုပ် သောနေရာသို့ သွားရောက်လေ့လာလည်ပတ်ပါသည်။ CBT Guide မှ ငှက်လိုက်ပွဲကို ဘယ်ချိန်မှာ ဘယ်လိုပြုလုပ်ကျင်းပတယ်ဆိုတာသေသေချာချာပြောပြတဲ့တွက် ငှက်လိုက်ပွဲကလဲ အလွန်စိတ်ဝင် စားစရာကောင်းသော ကယားရိုးရာပွဲတစ်ခုဖြစ်တယ်ဆိုတာ သိရပါသည်။

ငှက်လိုက်ပွဲပြုလုပ်သောနေရာသို့ သွားရောက်လည်ပတ်ပြီးလျှင် ဂျပ်ခုတ်(ရက်ကန်း) အဖွား အိမ်သို့ သွားရောက်လေ့လာပါသည်။ ဂျပ်ခုတ်(ရက်ကန်း)အဖွားအိမ်တွင်လည်း အဖွားမှာ ဂျပ်ခုတ် ရက်လုပ်ရန်အတွက် ချည်ဘယ်ကယူပြီး ချည်မျှင်ဖြစ်အောင်ဘယ်လိုပြုလုပ်တယ်စသော ချည်မျှင် ပြုလုပ်ပုံ၊ ချည်မျှင်ရရှိလာပုံ၊ နောက်ဆုံး ကယားရိုးရာဝတ်စုံတစ်စုံရအောင် အချိန် ဘယ်လောက်ကြာ ဂျပ်ခုတ်ရကြောင်းဆိုတဲ့ ဂျပ်ခုတ်ပုံအဆင့်ဆင့်ကိုလည်းလေ့လာသိရှိရပါသည်။ ကိုယ်တိုင်လည်း ဂျပ်ခုတ် ခြင်းကိုပါဝင်ပြုလုပ်နိုင်ပါသည်။ ဂျပ်ခုတ်ပုံလေ့လာပြီးလျှင် အရောင်အသွေး စုံလင်စွာလှပသော ကယား ရိုးရာဝတ်စုံများ ဝတ်ဆင်ခြင်းကိုပြုလုပ်ပါသည်။

ဂျပ်ခုတ်အဖွားအိမ်လေ့လာလည်ပတ်ပြီးလျှင် ရိုးရာလက်မှုလုပ်ငန်းပြုလုပ်သော အိမ်သို့သွား ရောက် လေ့လာလည်ပတ်ပါသည်။ လက်မှုလုပ်ငန်းတွင် ရိုးရာလက်ဝတ်ရတနာများ၊ တေးဂီတ တူရိယာ များ ပြုလုပ်ပုံအဆင့်ဆင့်ကိုလေ့လာပြီး ကိုယ်တိုင်လည်းပါဝင်ပြုလုပ်ပါသည်။ လက်မှုလုပ်ငန်း အိမ်လည် ပတ်ပြီးလျှင် တနီးလာလဲကျေးရွာမှ နွားလှည်းဖြင့် ကြာကန်သို့ သွားရောက်လည်ပတ်ပြီး ကယားပြည် နယ်၏ အထင်ကရတစ်ခုဖြစ်သော ကန်ခုနှစ်ဆင့်သို့ရောက်သည်ထိ နွားလှည်းဖြင့် ပို့ဆောင်ပေးပါသည်။ ကန်ခုနှစ်ဆင့်သို့ရောက်လျှင် ကယားရိုးရာ အတီးအမှုတ်ပညာရှင်များ၊ အကပညာရှင်များနှင့်တွေ့ဆုံပြီး ကယားရိုးရာတေးသီးချင်းများဖြင့် သီဆိုကပြလေ့ရှိပါသည်။ ထို့ပြင် ကန်နံဘေးတွင် ကယားရိုးရာ အကင်မှာယူစားသုံးပြီး ကန်ခုနှစ်ဆင့်၏ အလှတရားကို ကြည့်ရှုခံစားကာ အပန်းဖြေနိုင်ပါသည်။

ထေခိုကျေးရွာ

ခရီးသွားဧည့်သည်များကျေးရွာသို့ရောက်ရှိလျှင် ဦးစွာ Community Center တွင် CBT Guide မှ ကြိုဆိုပြီး ကျေးရွာတွင် ဆောင်ရွက်မည့်အစီအစဉ်များအား ရှင်းလင်းပြောကြားပါသည်။ ထို့နောက် CBT Guide မှ ဦးဆောင်ကာ ပထမဦးဆုံး ရိုးရာဝတ်စုံများပြုလုပ်သော ရက်ကန်းအိမ်သို့ သွားရောက် လေ့လာလည်ပတ်ပါသည်။ ရက်ကန်းအိမ်တွင် ရိုးရာဝတ်စုံပြုလုပ်ပုံ အဆင့်ဆင့်ကို လေ့လာနိုင်ပြီး ရိုးရာဝတ်စုံဝတ်ဆင်ခြင်းများပြုလုပ်ပါသည်။ ရက်ကန်းအိမ်လည်ပတ်ပြီးလျှင် ရိုးရာ လက်ဝတ်ရတနာများ ပြုလုပ်သော အိမ်သို့သွားရောက်လည်ပတ်ပြီး လက်ဝတ်ရတနာ ပြုလုပ်သော နည်းလမ်းများအား လေ့လာကာ ကိုယ်တိုင်ပါဝင်ပြုလုပ်ခြင်းများ လုပ်ဆောင်နိုင်ပါသည်။ ရိုးရာလက်ဝတ်ရတနာအိမ် လည်ပတ် ပြီးလျှင် ရိုးရာယဉ်ကျေးမှုအမွေအနှစ်များ ထိန်းသိမ်းထားသော ပြတိုက်သို့ သွားရောက်လည် ပတ်ပါသည်။ ပြတိုက်တွင် ကယောရိုးရာ ယဉ်ကျေးမှုအမွေအနှစ် တူရိယာပစ္စည်းများ၊ ကယောလူမျိုး များ၏ အသုံးအဆောင်ပစ္စည်းများကို တွေ့မြင်ရပါသည်။

ပြတိုက်သို့လည်ပတ်ပြီးလျှင် ကယောရိုးရာ(ဝါးဂစ်တာ)အတီးအမှုတ်ပညာရှင်နှင့်တွေ့ဆုံပြီး သာယာနာပျော်ဖွယ်ကောင်းသော ကယောရိုးရာတေးသံများ နားဆင်နိုင်ပါသည်။ ထို့နောက် ကယော ရိုးရာယဉ်ကျေးမှုတစ်ခုဖြစ်သည့် ကယောအိမ်များတွင် သက်ကြီးရွယ်အိုများမသေဆုံးမီ ကြိုတင်၍ အခေါင်းများပြုလုပ်ပြီး အိမ်အောက်တွင်ထားရှိသော အခေါင်းများအား သွားရောက် လေ့လာကြည့်ရှု ပါသည်။ ဤရိုးရာသည် ကယောလူမျိုးစု၏ ထူးဆန်းအံ့သြဖွယ်ကောင်းသော ဓလေ့ တစ်ခုဖြစ်ပါသည်။ ထေခိုကျေးရွာရှိ ခေါတမော့တောင်သို့ တောင်တက်ခြင်းလည်းပြုလုပ်ပါနိုင်ပါသည်။ စုစုပေါင်း တောင်တက်တောင်ဆင်း (၆)နာရီခန့်မျှ ကြာမြင့်ပါသည်။ တောင်ထိပ်သို့ရောက်လျှင် ငှက်ပစ်ခြင်းများ ပြုလုပ်ပြီး ခရီးလမ်းတစ်လျှောက် တောတောင်သဘာဝပတ်ဝန်းကျင် အလှအပများကို ခံစားကာ တောင်တက်ခရီးစဉ်တွင် အစာပြေစားသောက်ရန်အတွက် နေ့လည်စာ ထမင်းထုပ်မှာယူစားသုံးခြင်းများ ပြုလုပ်ပါသည်။

ဒေါတမကြီးကျေးရွာ

ခရီးသွားဧည့်သည်များကျေးရွာသို့ရောက်ရှိပါက ဦးစွာ Community Center တွင် CBT Guide မှ ကြိုဆိုပြီး ကျေးရွာတွင် ဆောင်ရွက်မည့်အစီစဉ်များအား ရှင်းလင်းပြောကြားပါသည်။ ထို့နောက် CBT Guide မှ ဦးဆောင်ကာ ပထမဦးဆုံး ကျေးရွာတံခွန်တိုင်သို့ သွားရောက်လည်ပတ်ပြီး တံခွန်တိုင်ပွဲ ဘာကြောင့်ပြုလုပ်ရတာလဲ၊ ဘယ်လိုပြုလုပ်ကြတယ်၊ ဘယ်ချိန်ပြုလုပ်တယ်၊ ဘယ်လို ပြင်ဆင်ကြတယ်၊ ဆောင်ရန်ရှောင်ရန်တွေကဘယ်လိုဆိုတဲ့ ကျေးရွာတံခွန်တိုင်ပွဲ ဖြစ်ပေါ်လာပုံနှင့် ပြုလုပ်ပုံအဆင့်ဆင့်ကို CBT Guide မှ သေသေချာချာရှင်းပြပေးပါသည်။ ကျေးရွာတံခွန်တိုင်လည်ပြီးလျှင် ငှက်လိုက်ပွဲပြုလုပ် သောနေရာသို့ သွားရောက်လေ့လာလည်ပတ်ပါသည်။ CBT Guide မှ ငှက် လိုက်ပွဲကို ဘယ်ချိန်မှာ ဘယ်လိုပြုလုပ်ကျင်းပတယ်ဆိုတာသေသေချာချာပြောပြတဲ့တွက် ငှက်လိုက် ပွဲကလဲ အလွန်စိတ်ဝင်စား စရာကောင်းသော ကယားရိုးရာပွဲတစ်ခုဖြစ်တယ်ဆိုတာ သိရပါသည်။

ငှက်လိုက်ပွဲပြုလုပ်သောနေရာသို့ သွားရောက်လည်ပတ်ပြီးလျှင် ဂျပ်ခုတ်(ရက်ကန်း) အဖွား အိမ်သို့ သွားရောက်လေ့လာပါသည်။ ဂျပ်ခုတ်(ရက်ကန်း)အဖွားအိမ်တွင်လည်း အဖွားမှာ ဂျပ်ခုတ် ရက်လုပ်ရန်အတွက် ချည်ဘယ်ကယူပြီး ချည်မျှင်ဖြစ်အောင်ဘယ်လိုပြုလုပ်တယ်စသော ချည်မျှင် ပြုလုပ် ပုံ၊ ချည်မျှင်ရရှိလာပုံ၊ နောက်ဆုံး ကယားရိုးရာဝတ်စုံတစ်စုံရအောင် အချိန်ဘယ်လောက်ကြာ ဂျပ်ခုတ် ရကြောင်းဆိုတဲ့ ဂျပ်ခုတ်ပုံအဆင့်ဆင့်ကိုလည်းလေ့လာသိရှိရပါသည်။ ကိုယ်တိုင်လည်း ဂျပ်ခုတ်ခြင်းကို ပါဝင်ပြုလုပ်ပါသည်။ ဂျပ်ခုတ်ပုံလေ့လာပြီးလျှင် အရောင်အသွေး စုံလင်စွာလှပသော ကယားရိုးရာ ဝတ်စုံ များ ဝတ်ဆင်ခြင်းကိုပြုလုပ်ပါသည်။

ဂျပ်ခုတ်အဖွားအိမ်လေ့လာလည်ပတ်ပြီးလျှင် ရိုးရာလက်မှုလုပ်ငန်းပြုလုပ်သော အိမ်သို့ သွား ရောက် လေ့လာလည်ပတ်ပါသည်။ လက်မှုလုပ်ငန်းတွင် ရိုးရာလက်ဝတ်ရတနာများ၊ တေးဂီတ တူရိယာ များ ပြုလုပ်ပုံအဆင့်ဆင့်ကိုလေ့လာပြီး ကိုယ်တိုင်လည်းပါဝင်ပြုလုပ်ပါသည်။ လက်မှု လုပ်ငန်းအိမ် လည်ပတ်ပြီးလျှင် ရွာပြင်တွင် စပါးများအား သိမ်းဆည်းသိုလှောင်ထားသောနေရာသို့ သွားရောက် လည်ပတ်ပါသည်။ထို့နောက် ကယားရိုးရာ အတီးအမှုတ် ပညာရှင်များ၊ အကပညာရှင် များနှင့်တွေ့ဆုံပြီး ကယားရိုးရာတေးသီးချင်းများဖြင့် သီဆိုကပြလေ့ရှိပါသည်။

Visit Around

ပန်ပက်ကျေးရွာအနီးတဝိုက်ရှိ လည်ပတ်စရာနေရာများ

လွိုင်နန်းဖတောင်

ကယားပြည်နယ်တွင် ထူးခြားသော တောင်စဉ်တောင်တန်းများစွာရှိပါသည်။ ထိုတောင် များတွင် ဒီးမော့ဆိုမြို့နယ်အတွင်းရှိ လွိုင်နန်းဖတောင်သည် ထူးခြားသည့် ဝိသေသနများဖြင့် ပြည့်နက်နေပါသည်။ ကယားတိုင်းရင်းသားလူမျိုးတို့၏ တန်းတူညီမျှမှုစိတ်ထားနှင့် တစ်ဦးပေါ်တစ်ဦးလေးစားမှုများသည် ဘာသာရေးလွတ်လပ်ခွင့်များ လွိုင်နန်းဖတောင်ပေါ်တွင် သိသာ ထင်ရှားစွာတွေ့မြင်နိုင်ပါသည်။ ပေပေါင်း (၅၀၀၀) ကျော်မြင့်မားသည့် တောင်ပေါ်သို့ တက် ရောက်နေစဉ်အတွင်း ဒေသမျိုးရင်းပန်းမျိုးများနှင့် ငှက်များကို လေ့လာနိုင်ပါသည်။ လွိုင်နန်းဖ တောင်ပေါ်မှ ကယားပြည်နယ်၏ ရှုခင်းအလှများကို တွေ့မြင်နိုင်သည့်အပြင် ခရစ်ယာန် လက်ဝါးကားတိုင်နှင့် ကြည်ညိုသပ္ပါယ်ဖွယ်ရာ စေတီတော်ကို ဖူးမျှော်နိုင်သည့်အတွက်တောင်ထိပ် သို့ရောက်ရှိချိန်တွင် မောပန်းမှုစိတ်များသည် ကြည်နူးလန်းဆန်းတက်ကြွလာပါသည်။

ငွေတောင်ဆည်

ပန်ပက်ကျေးရွာသို့ သွားရောက်ရာခရီးလမ်းတစ်လျှောက်တွင် ငွေတောင်ဆည်ကို ဖြတ်၍ သွားရောက်ရပါသည်။ ထို့ကြောင့် ပန်ပက်ကျေးရွာသို့ သွားရောက်လည်ပတ်သည့်အခါများတွင် ငွေတောင်ဆည်ကိုပါ တစ်ပါတည်းဝင်ရောက်လည်ပတ်နိုင်ပါသည်။ ငွေတောင်ဆည်သည်လည်း ကယားပြည်နယ်၏ အထင်ကရခရီးစဉ်တစ်ခုဖြစ်ပါသည်။ကယားပြည်နယ်ဟုဆိုလျှင် “ငွေတောင် ပြည်၊ ငွေတောင်ဆည်”ဟု သိရှိကြပါသည်။ ငွေတောင်ဆည်ကြီးသည် လွိုင်ကော်မြို့ မှ(၉)မိုင် အကွာအဝေးတွင်တည်ရှိပါသည်။ ပြည်တွင်း/ပြည်ပခရီးသွားဧည့်သည်များနှင့် ဒေသခံပြည်သူများ ၏ အနားယူအပန်းဖြေရာရှုမငြီးဖွယ်နေရာတစ်ခုဖြစ်ပါသည်။

တနီးလာလဲကျေးရွာအနီးတဝိုက်ရှိ လည်ပတ်စရာနေရာများ

ထီးပွင့်ကန်

ထီးပွင့်ကန်သည် ကယားပြည်နယ်၊ ဒီးမော့ဆိုမြို့နယ်၊ ငွေတောင်ဆည်အရှေ့ဘက်၊ ဒေါကလိုခူကျေးရွာအနီး၊ လွိုင်ကော်မြို့မှ(၁၂)မိုင်ခန့် အကွာတွင် တည်ရှိပါသည်။ ထီးပွင့်ကန် သည် မြန်မာနိုင်ငံရှိ ရေကန်များအနက် သဘာဝ အတိုင်း ထူးခြားစွာဖြစ်တည်နေသည့် တည်ရှိပုံ များကြောင့် အလွန်ထင်ရှားသည့် ရေကန်ဖြစ်ပါသည်။ကန်အလယ်တွင် ရွှံ့နုန်းမြေများ ထီးပွင့်ပုံ သဏ္ဍာန်အဖြစ် ရေပြင်ပေါ်သို့ ပြူတက်လာခြင်း ထီးပွင့်ကန်၏ ထူးခြားချက်ဖြစ်ပါတယ်။ ဘူမိဗေဒ သဘောအရ အပေါ်ယံမြေဆီလွှာတွင် ဇီဝဖြစ်စဥ်ပြောင်းလဲမှုများကြောင့် ဇီဝဓာတ်ငွေ့များ ထွက်ပေါ်လာရာမှ ဖြစ်ပေါ်လာသော “ရွံ့မီးတောင်အသေးစား” ဖြစ်တယ်လို့ ယူဆကြပါသည်။

ထီးပွင့်လေးများကို လပြည့်၊ လကွယ်နေ့ များတွင် ပိုမိုမြင်တွေ့နိုင်ပြီး အခြားအချိန်များတွင် သေးငယ်စွာဖူးပွင့်နေတာကိုလည်း တွေ့မြင်နိုင်ပါသည်။ ထီးပွင့်ကန် အနီးတွင် ဒွေးမယ်နော်တို့ သစ္စာပြုရာ သစ္စာကန်လည်းတည်ရှိတဲ့အပြင် ကယားလူမျိုးတို့ ကိုးကွယ်ကြတဲ့ ရိုးရာတံခွန် တိုင်များကိုလည်း မြင်တွေ့နိုင်ပါသည်။ ထီးပွင့်ကန်သည် တနီးလာလဲ CBT ကျေးရွာအနီးတွင် တည်ရှိသည့်အတွက် တနီးလာလဲ CBT ကျေးရွာသို့လည်း တစ်ဆက်တည်းဝင်ရောက်လည်ပတ် နိုင်ပါသည်။

ကန်ခုနှစ်ဆင့်

ကန်ခုနှစ်ဆင့်သည် ဒီးမော့ဆိုမြို့နယ်တွင်တည်ရှိပြီး လွိုင်ကော်မြို့မှ ၁၄ မိုင်ခန့်အကွာတွင် တည်ရှိပါသည်။ ကယားပြည်နယ်၏ အထင်ကရပုံရိပ် တစ်ခုဖြစ်သည့် ဒဏ္ဍာရီသမိုင်းကြောင်းထဲမှ ကိန္နရီညီအစ်မ(၇)ဖော်တို့ ရေကစားပျော်စံခဲ့ရာ ကန်လည်းဖြစ်ပါသည်။ ကန်ခုနှစ်ဆင့်ဟုဆိုသည့် အတိုင်းပင် သဘာဝအတိုင်း ရေကန်(၇)ကန်ကို တွေ့မြင်နိုင် သည့်အပြင် စိမ်းစိုသာယာနေသည့် တောင်တောင်ရေမြေအလှများကြောင့် စိတ်အေးချမ်းပျော်ရွှင် မှုများရရှိနိုင်ပါသည်။ ကန်အနီးရှိ တနီးလာလဲကျေးရွာလေးတွင် ကယားလူမျိုးတို့၏ ရိုးရာယဉ် ကျေးမှုများကို လေ့လာနိုင်သည့် အပြင် ကန်နံဘေးတွင် တောင်တောင်ရေမြေသဘာဝအလှများကို ခံစားရင်း ရွာခံများပြင်ဆင် ပေးသည့် ရိုးရာအစားအစာများကိုလည်း သုံးဆောင်နိုင်သည့်အတွက် ပြည်တွင်းခရီးသွားများ သာမက ပြည်ပခရီးသွားဧည့်သည်များပါ လွန်စွာနှစ်သက်သည့် ခရီးစဉ်တစ်ခုဖြစ်ပါသည်။

ထေခိုကျေးရွာအနီးတဝိုက်ရှိ လည်ပတ်စရာနေရာများ

ဆင်ဖြူတောင်

ဆင်ဖြူတောင်သည် ဖရူဆိုမြို့နယ်ရှိ မော်သီဒိုကျေးရွာအနီးတွင် တည်ရှိပြီး လွိုင်ကော်မြို့ မှ မိုင်(၄၀)အကွာတွင် တည်ရှိပါသည်။ Trekking လျှောက်ခြင်း၊ တောင်တက်ခြင်း၊ Adventure Tripများ ဆောင်ရွက်နိုင်ပါသည်။ ဆင်ဖြူတောင်သည် သုံးရာသီလုံးတွင် တမူထူးခြား သည့် အလှများ၊ စိမ်းစို လှပသည့် သဘာဝအလှတရားများနှင့် ကြိုဆိုနေတတ်သည့်အပြင် လမ်းခရီးတစ်လျှောက်တွေ့ မြင်ရသည့် ရှုခင်းများသည် ရင်သပ်ရှုမောဖွယ်ကောင်းလှပါသည်။ ထေခို CBT ကျေးရွာသွားရောက်သည့် လမ်းတွင်တည်ရှိ သည့်အတွက် ဆင်ဖြူတောင်မှတစ်ဆင့် ထေခို CBT ကျေးရွာသို့လည်း သွားရောက်လည်ပတ်နိုင်ပါသည်။

ထီးပရူးနူးသဘာဝလှိုင်ဂူ

ထီးပရူနူဂူသည် ဖရူဆိုမြို့နယ်၊ မော်သီဒိုကျေးရွာအနီး တည်ရှိပါသည်။လွိုင်ကော် မြို့မှ (၂၄)မိုင် အကွာတွင်တည်ရှိပါသည်။ သဘာဝထုံးကျောက် လှိုဏ်ဂူကြီးတစ်ခုဖြစ်ပါသည်။လှိုဏ်ဂူဝ တွင် သဘာဝရေတံခွန် ဖြစ်ပေါ် နေခြင်း၊ မြေအောက်မြစ် မြေအောက်ဂူ နှစ်မျိုးတွဲနေသည့် လှိုဏ်ဂူဖြစ်ပါသည်။ စွန့်စား ခရီးသွားခြင်းကို နှစ်သက်သည့် ခရီးသွား ဧည့်သည်များအတွက် ဆွဲဆောင်နိုင်သည့် နေရာတစ်ခုဖြစ်ပါသည်။

Getting There

CBT Site သို့ သွားရောက်လည်ပတ်နိုင်သည့်လမ်းကြောင်းများ

ပန်ပက်ကျေးရွာ

ပန်ပက်ကျေးရွာသည် ဒီးမော့ဆိုမြို့နယ်အတွင်းတည်ရှိပြီး လွိုင်ကော်မြို့ မှ ပန်ပက်ကျေးရွာ သို့ သွားရောက်မည်ဆိုပါက (၂၆) မိုင် ကွာဝေးပြီး မော်တော် ယာဉ်ဖြင့် (၁)နာရီခန့် သွားရပါသည်။ ဒီးမော့ဆိုမြို့မှ ပန်ပက်ကျေးရွာသို့ သွားရောက်ပါက (၁၅)မိုင် ကွာဝေးပြီး မော်တော်ယာဉ်ဖြင့် (၃၅) မိနစ်ခန့် သွားရပါသည်။

တနီးလာလဲကျေးရွာ

တနီးလာလဲကျေးရွာသည် ဒီးမော့ဆိုမြို့နယ်တွင်တည်ရှိပြီး လွိုင်ကော်မြို့မှ တနီးလာလဲကျေး ရွာသို့ သွားရောက်မည်ဆိုပါက (၁၃)မိုင် ကွာဝေးပြီး မော်တော်ယာဉ်ဖြင့် (၃၀)မိနစ်ခန့် သွားရပါသည်။ ဒီးမော့ဆိုမြို့မှ တနီးလာလဲကျေးရွာသို့ သွားရောက်ပါက (၂)မိုင်ကွာဝေးပြီး မော်တော်ယာဉ်ဖြင့် (၅)မိနစ်ခန့် သွားရပါသည်။

ထေခိုကျေးရွာ

ထေခိုကျေးရွာသည် ဖရူဆိုမြို့နယ်အတွင်းတည်ရှိပြီး လွိုင်ကော်မြို့မှ ထေခိုကျေးရွာသို့ သွားရောက်မည်ဆိုပါက (၄၂) မိုင်ကွာဝေးပြီး မော်တော်ယာဉ်ဖြင့် (၃)နာရီခန့်သွားရပါသည်။ ဖရူဆို မြို့မှ သွားရောက်ပါက (၂၂) မိုင်ကွားဝေးပြီး မော်တော်ယာဉ်ဖြင့် (၁)နာရီ (၃၀)မိနစ်ခန့်သွားရပါသည်။

ဒေါတမကြီးကျေးရွာ

ဒေါတမကြီးကျေးရွာသည် ဒီးမော့ဆိုမြို့နယ်အတွင်းတည်ရှိပြီး လွိုင်ကော်မြို့မှ ဒေါတမကြီး ကျေးရွာသို့သွားရောက်မည်ဆိုပါက (၃၉)မိုင်ကွာဝေးပြီး မော်တော်ယာဉ်ဖြင့် (၁)နာရီနှင့် (၄၅)မိနစ် ကျော် သွားရောက်ရပါသည်။ ဒီးမော့ဆိုမြို့မှ သွားရောက်မည်ဆိုပါက (၂၇)မိုင် ကွာဝေးပြီး မော်တော်ယာဉ်ဖြင့် (၁)နာရီ (၂၀) မိနစ်ခန့်သွားရပါသည်။

Contact Us

Loikaw CBT Site

Address: Pan Pet village, Hta Nee La Leh village, Htay Kho village, Daw Ta Ma Gyi village, Kayah State.

Call; +95 (0) 428332407

Email: aungkyawthu.006@gmail.com

Website: www.kayahtourism.org, www.tourisminmyanmar.com.mm

Facebook – Tourism Kayah (mm version), Travel Kayah (eng version)

Instagram – travelkayahmyanmar, tourisminmyanmar.com.mm

Youtube – Travel Kayah

CONTACT INFO

ရုံးအမှတ်(၃၃)၊ဟိုတယ်နှင့်ခရီးသွားလာရေးဝန်ကြီးဌာန၊နေပြည်တော်၊ ပြည်ထောင်စုသမ္မတ မြန်မာနိုင်ငံတော်။
+၉၅၆၇၃၄၀၆၄၅၈, +၉၅၆၇၃၄၀၆၂၄၇, +၉၅၆၇၃၄၀၆၁၂၉
info@tourism.gov.mm

အချက်အလက်

မြန်မာနိုင်ငံအကြောင်း
အွန်လိုင်းမှဗီဇာလျှောက် ထားခြင်း
ခရီးသွားကုမ္ပဏီများ အတွက် လမ်းညွန်ချက်များ
ဆောင်ရန်/ရှောင်ရန် အချက်များ
နယ်ရုံးခွဲများ
ခရီးစဉ်ဒေသအလိုက် ဝင်ကြေးများ
မြန်မာသံရုံးများ

လမ်းညွှန်ချက် နှင့် အရင်းအမြစ်များ

စွဲမက်ဖွယ်ရာ ပြည်မြန်မာ
မြန်မာပြည်သို့ ခရီးသွားစို့
လက်ကမ်းစာစောင်များ
ခရီးသွားလမ်းညွှန်စာအုပ်များ
ကြေညာချက်များ

သင်၏ အားလပ်ရက်များကို မြန်မာနိုင်ငံသို့ လာရောက်လည်ပတ်ရင်း ကုန်ဆုံးနိုင်ရန် နည်းလမ်းကောင်းများကို ရှာဖွေပါ။ တစ်ကမ္ဘာလုံးနှင့် ရိုးရာယဉ်ကျေးမှုအမွေအနှစ်များကို မျှဝေရန် စောင့်ဆိုင်းနေသော အာရှတိုက်၏ အလှပဆုံးနိုင်ငံ၏ ယဉ်ကျေးမှုတွင် စီးဝင်ရန် အကောင်းဆုံး အချိန်ပင်ဖြစ်ပါသည်။

Copyright © Ministry of Hotels and Tourism.
2022 All Rights Reserved