တရုတ်နိုင်ငံသားနှင့် အိန္ဒိယနိုင်ငံသား ကမ္ဘာလှည့်ခရီးသည်များအတွက် ဆိုက်ရောက်ဗီဇာ (ကမ္ဘာလှည့်) Tourist Visa On Arrival အား မကြာမီခွင့်ပြုပေးသွားမည်ဖြစ်ကြောင်း အသိပေးခြင်း

၁။        မြန်မာနိုင်ငံအတွင်းသို့ လေကြောင်းခရီးဖြင့် ဝင်ရောက်လာသည့် တရုတ်နိုင်ငံနှင့် အိန္ဒိယ နိုင်ငံသား ကမ္ဘာလှည့်ခရီးသည်များအတွက် ဆိုက်ရောက်ဗီဇာ (ကမ္ဘာလှည့်) Tourist Visa On Arrival ကို (၃၀.၀၈.၂၀၂၃) ရက်မှ စတင်၍ စမ်းသပ်ကာလ (၁) နှစ် သတ်မှတ်ပြီး ကျန်းမာရေးဝန်ကြီးဌာနမှ ထုတ်ပြန်ထားရှိသော ကိုဗစ်-၁၉ ရောဂါကာကွယ်၊ ထိန်းချုပ်၊ ကုသရေးစည်းမျဉ်းစည်းကမ်း သတ်မှတ်ချက်များနှင့်အညီ ခွင့်ပြုဆောင်ရွက်ပေးသွားမည် ဖြစ်ပါသည်။

၂။         တရုတ်နိုင်ငံနှင့် အိန္ဒိယနိုင်ငံသား ကမ္ဘာလှည့်ခရီးသွားများ အပြည်ပြည်ဆိုင်ရာလေဆိပ်သို့ ဝင်ရောက်လာပါက ဆိုက်ရောက်ဗီဇာ (ကမ္ဘာလှည့်) အား အောက်ပါအတိုင်း ခွင့်ပြုဆောင်ရွက် သွားမည် ဖြစ်ပါသည်-

            (က)     အပြည်ပြည်ဆိုင်ရာလေဆိပ်များသို့ ရောက်ရှိလာပါက ဆိုက်ရောက်ဗီဇာလျှောက်လွှာအား အခမဲ့ရယူ၍ (၁.၂ x ၁.၅) လက်မ Colour Photo (၂) ပုံနှင့်အတူ လျှောက်လွာ ပုံစံ ဖြည့်သွင်းရမည် ဖြစ်ပါသည်။

            (ခ)       ဆိုက်ရောက်ဗီဇာအခငွေ (၁) ဦးလျှင် အမေရိကန်ဒေါ်လာ (၅၀) ကောက်ခံ၍ နေခွင့် (၃၀ ရက်) ခွင့်ပြုသွားမည်ဖြစ်ပါသည်။

            (ဂ)       အလည်အပတ် ဝင်ရောက်ခြင်းအတွက်သာဖြစ်၍ ကမ္ဘာလှည့်ဗီဇာ (Tourist Visa)  တစ်မျိုးတည်းသာ ခွင့်ပြုသွားမည်ဖြစ်ပါသည်။

            (ဃ)     နိုင်ငံကူးလက်မှတ်သက်တမ်း အနည်းဆုံး (၆) လ ရှိရမည်ဖြစ်ပြီး (၆) လ အောက်ဖြစ်  ပါက ပြည်ဝင်ခွင့်မပြုဘဲ ခရီးသည်လိုက်ပါလာသည့် လေကြောင်းလိုင်းဖြင့် ပြန်လည် တင်ပို့ခြင်းခံရမည် ဖြစ်ပါသည်။

            (င)       နေခွင့်သက်တမ်း တိုးမြှင့်ပေးရန် လျှောက်ထားခြင်းကို ခွင့်ပြုမည်မဟုတ်ပါ။

            (စ)       နေထိုင်ခွင့်သတ်မှတ်ရက်ထက် ကျော်လွန်နေထိုင်ပါက သတ်မှတ်ရက်လွန်ဒဏ်ကြေး အခငွေ ပေးဆောင်ရမည် ဖြစ်ပါသည်။

၃။        ဆိုက်ရောက်ဗီဇာ (ကမ္ဘာလှည့်) ဖြင့် ဝင်ရောက်လာသော တရုတ်နိုင်ငံနှင့် အိန္ဒိယနိုင်ငံသား များသည် အောက်ဖော်ပြပါစည်းကမ်းများကို လိုက်နာနေထိုင်ရပါမည်-

            (က)     မြန်မာနိုင်ငံ၏ တည်ဆဲဥပဒေ၊ လုပ်ထုံးလုပ်နည်းများကို လေးစားလိုက်နာရမည်ဖြစ်ပါသည်။

            (ခ)       မြန်မာနိုင်ငံအတွင်း လုံခြုံရေးအရ တားမြစ်ကန့်သတ်ထားသော နယ်မြေမှအပ နိုင်ငံခြားသားများ သွားလာခွင့်ရှိသည့်နေရာများကို လွတ်လပ်စွာ သွားလာနိုင်သည်။

            (ဂ)       ဆိုက်ရောက်ဗီဇာ (ကမ္ဘာလှည့်) ဖြင့် ဝင်ရောက်ရန် ရောက်ရှိလာသူသည် သက်ဆိုင်ရာလုံခြုံရေးဌာန/ အဖွဲ့အစည်းများမှ ခွင့်မပြုလျှင်သော်လည်းကောင်း၊ လူဝင်မှုကြီးကြပ်ရေးဦးစီးဌာန၏ အမည်မည်းစာရင်း (Blacklist) တွင် ပါဝင်ပါက ပြည်ဝင်ခွင့်အား ငြင်းပယ်သွားမည်ဖြစ်ပြီး ခရီးသည်လိုက်ပါလာသည့် လေကြောင်းလိုင်းဖြင့် ပြန်လည်တင် ပို့ခြင်း ခံရမည်ဖြစ်ပါသည်။

            (ဃ)     အပြည်ပြည်ဆိုင်ရာလေဆိပ်များမှ ဆိုက်ရောက်ဗီဇာဖြင့် ဝင်ရောက်လာသူသည် မည်သည့် အပြည်ပြည်ဆိုင်ရာဝင်/ထွက်ပေါက်များမှမဆို ပြန်လည်ထွက်ခွာနိုင်မည် ဖြစ်ပါသည်။

                                                                                      လူဝင်မှုကြီးကြပ်ရေးဦးစီးဌာန

                                                                                                နေပြည်တော်

Source From: Ministry of Immigration and Population